1. Mang e ri ma gelnag e felfelan’ rodad?

 BAADAG Jehovah ni ngad felfelan’gad. Gad manang e re n’ey ni bochan e felfelan’ e aram bang u wom’engin gelngin Got nib thothup. (Gal. 5:22) Bochan nib gel e felfelan’ ni ma yib ni ngad pied ban’en ngak be’ ko bin ni be’ e nge pi’ ban’en ngodad, ma aram fan ni gad ma felfelan’ u nap’an ni gad ra maruwel nib gel u nap’an e machib ma gad be ayuweg pi walagdad u boch e kanawo’ nib thilthil.​—Acts 20:35.

2-3. (a) Mang l’agruw ban’en nra ayuwegdad ni ngad pared ni gad ba felfelan’ ko pigpig rodad ngak Jehovah nrogon ni be yog e Galatia 6:4? (b) Mang e gad ra weliy ko re article ney?

² I weliy apostal Paul l’agruw ban’en ko Galatia 6:4 nra ayuwegdad ni ngad pared ni gad ba felfelan’. (Mu beeg.) Bin som’on e susun ni ngad nameged ni ngad pied e tin th’abi fel’ rodad ngak Jehovah. Faanra gad be pi’ e tin th’abi fel’ rodad ngak, ma susun e gad ra felfelan’. (Matt. 22:36-38) Bin migid e susun e dab ud taareb rogonnaged gadad ngak yugu boch e girdi’. Demtrug e tin be yag ni ngad rin’ed ni bochan rarogon fithik’ i dowdad ara tin kad filed ara pi salap rodad, ma susun e ngad pininged e magar riy ngak Jehovah. Ya bin riyul’ riy e gubin ban’en ni bay rodad ma ir e ke yib rok. Machane faanra bay boch e walag ni bay boch ban’en u rogon e machib ni yad ba salap riy ngodad, ma susun e ngad felfelan’gad ngay ni yad be fanay e salap rorad ni ngar n’ufed Jehovah, ma gathi bochan e nge m’ug ni ka yad ba fel’ ko tin ka bay e girdi’ ara nge fel’ boch ban’en riy ngorad. Ere susun e ngad filed ban’en rorad ko bin ngad tagenginggad ngorad.

³ Gad ra fil ko re article ney e n’en nra ayuwegdad u nap’an nra mulan’dad ni bochan e dabkiyog ni ngad rin’ed urngin e tin gad baadag ni ngad rin’ed ni fan ko pigpig rodad ngak Jehovah. Ku gad ra weliy rogon ni ngad maruwelgad ko pi salap rodad nib fel’ rogon nge n’en nrayog ni ngad filed rok yugu boch e girdi’.

4. Mang reb e ban’en nrayog ni nge muleg laniyan’ boch i gadad? Mu weliy ban’en ni ke buch.

⁴ Bay boch i gadad ndabkiyog ni nge rin’ e tin baadag ni fan ko pigpig rok ngak Jehovah ni bochan e be pilibthir i yan ara ke m’ar, ma re n’ey e ma muleg lanin’dad. Aram e n’en ni buch rok Carol. Kafram e i machib ko gin nib t’uf e ayuw ko machib riy. Ngiyal’ nem e i fil e Bible ngak 35 e girdi’ me yag ni nge ayuweg boch i yad ni ngar mon’oggad ngar uned ko taufe. Rib fel’ rogon e machib ni i tay Carol! Machane me m’ar, ma thingari par u tabinaw. I gaar: “Gu manang ndabkiyog ni nggu rin’ e tin be yag ni nge rin’ yugu boch e girdi’ ni bochan e kug m’ar. Machane gu be lemnag ni gathi ri gub yul’yul’ ni bod yad. Dabkiyog ni nggu rin’ urngin e tin gu baadag ni nggu rin’, ma re n’ey e ma muleg lanin’ug.” Baadag Carol ni nge rin’ urngin e tin rayog rok ni fan ngak Jehovah, ma rib manigil e re n’ey! Rayog ni nge pagan’dad ngay ni Got rodad nib ta runguyey e ba felfelan’ ni bochan e be rin’ Carol e tin rayog rok.

5. (a) Mang e susun ndab da paged talin ni faanra bay yu ngiyal’ ni ma mulan’dad ni bochan e bay ban’en ni be talegdad ndabiyog ni ngad rin’ed e tin gad baadag ni fan ko pigpig rodad? (b) Uw rogon ni ke pi’ fare walag ni pumoon e tin th’abi fel’ rok ngak Jehovah u n’umngin nap’an e yafos rok nrogon ni be m’ug ko fapi sasing?

⁵ Faanra bay yu ngiyal’ ni ma mulan’um ni bochan e bay ban’en ni be talegem ndabiyog ni ngam rin’ e tin ga baadag ni fan ko pigpig rom, ma ngam fithem ni nge lungum, ‘Mang e baadag Jehovah ni nggu rin’?’ Baadag ni ngam rin’ e tin rayog u rarogom e chiney. Am lemnag e re n’ey: Bay reb e walag nib pin ni ke gaman 80 e duw rok ni ke mulan’ ni bochan e dabkiyog ni nge rin’ boor ban’en ni fan ko machib ni bod ni i rin’ u nap’an ni 40 e duw rok. Be lemnag nde fel’ u wan’ Jehovah e tin be rin’ ni yugu aram rogon ni be pi’ e tin th’abi fel’ rok ngak. Machane gur, riyul’ e re n’ey? Am lemnag e re n’ey. Faanra i pi’ e re walag ney e tin th’abi fel’ rok ngak Got u nap’an ni 40 e duw rok, ma ka be pi’ e tin th’abi fel’ rok e chiney ni ke gaman 80 e duw rok, ma bin riyul’ riy e dariy ba ngiyal’ ni ke tal ndaki pi’ e tin th’abi fel’ rok ngak Got. Faanra gad be lemnag nde fel’ u wan’ Jehovah e tin gad be rin’ ni fan ngak, mab t’uf ndab da paged talin ni Jehovah e ir e ma dugliy urngin e tin ngad pied ngak nra m’agan’ ngay. Ere faan gad ra rin’ e tin rayog rodad, ma aram e ra gaar Jehovah ngodad: “Ri gab manigil!”​—Mu taarebrogonnag ko Matthew 25:20-23.

6. Mang e rayog ni ngad filed ko n’en ni buch rok Maria?

⁶ Ra mom ni ngad felfelan’gad ni faanra da tedan’dad ko tin rayog rodad ko bin ngad lemnaged e tin dabiyog rodad. Am lemnag e n’en ni buch rok reb e walag nib pin ni ka nog Maria ngak ni bay ba mit e m’ar rok ni be taleg ndabiyog ni nge rin’ boor ban’en ni fan ko machib. Som’on e ri kireban’ me lemnag ndariy fan. Machane me lemnag rarogon reb e walag nib pin u lan e ulung ni ke aw nga but’ ndabkiyog ni nge un ko yan, ma aram me dugliy ni nge ayuweg. I gaar: “Gu yarmiy ni ngaug machibgow u telefon ma gamow be yoloy e babyor ngaug piew ko girdi’. Gubin yay ni gamow ra machib u taabang, ma nap’an nug ra sul nga tabinaw ma gub felfelan’ ni bochan e ke yag ni nggu ayuweg walageg.” Ku arrogodad nrayog ni ngad gelnaged e felfelan’ rodad ni faanra da tedan’dad ko tin rayog rodad ko bin ngad lemnaged e tin dabiyog rodad. Machane uw rogon ni faanra rayog ni ngkud yoornaged e tin gad be rin’ ara bay boch ban’en ni gad be rin’ ni fan ko pigpig rodad ngak Jehovah ni gad ba salap riy?

7. Mang e fonow nib manigil ni pi’ apostal Peter ngak e piin Kristiano?

⁷ U lan e gin som’on e babyor ni yoloy apostal Peter e pi’ e athamgil riy nga laniyan’ e pi walag ni ngar fanayed e pi tow’ath nge salap ni bay rorad ni ngar pied e athamgil nga laniyan’ pi walagrad. I yoloy ni gaar: “Ra be’ ma tow’ath rok  ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (1 Pet. 4:10) Susun e ngad maruwelgad ko pi salap rodad u rogon feni fel’ nrayog rodad ma dab da magargad nri chey me awan’ yugu boch e girdi’ ngodad ara mulan’rad. Ya faanra danga’, ma aram e darud pied e tin th’abi fel’ rodad ngak Jehovah.

8. Mang fan nsusun e dab da ufgad ko pi salap ni bay rodad nrogon ni be yog e 1 Korinth 4:6, 7?

⁸ Ba t’uf ni ngad maruwelgad ko pi salap rodad nib fel’ rogon, machane thingar da kol ayuwgad ndab da ufgad ngay. (Mu beeg e 1 Korinth 4:6, 7.) Bod nsana gab salap u rogon ni ngam tabab i fil e Bible ngak e girdi’. Ere susun e ngam maruwel ko biney e tow’ath ni bay rom! Machane dab mu uf ngay. Susun e kam mada’nag be’ u nap’an e machib ma ke yag ni ngam tabab i fil e Bible ngak. Ere ri ga baadag ni ngam weliy murung’agen ngak e pi walag ni gimed ma machib u taabang. Machane nap’an nim mada’gad, ma bay reb e walag nib pin ni be weliy murung’agen be’ ni ke yag ni nge pi’ reb e magazine ngak. Fare walag e ke pi’ reb e magazine ngak be’, me gur e ke yag ni ngam tabab i fil e Bible ngak be’. Ere mang e ga ra rin’? Ga manang nra felfelan’ e pi walag ni ngar rung’aged murung’agen e n’en ke yag ni ngam rin’. Machane sana ga ra dugliy ni ngam son nga fini ba ngiyal’ mag weliy ngorad ni bochan e dabum ni ngam k’aring fare walag ni nge lemnag ni gathi rib ga’ angin e machib ni be tay ni bod gur. Aram e n’en nib fel’ ni ngam rin’. Machane dab mu tal i ognag e fol Bible ko girdi’, ya bin riyul’ riy e bay reb e tow’ath rom. Ere mmaruwel ngay!

9. Uw rogon nsusun e ngad maruwelgad ko pi tow’ath rodad?

⁹ Dab da paged talin ni pi salap ni bay rodad e bogi tow’ath ni ke yib rok Got. Ere susun ni ngad maruwelgad ngay ni ngad ayuweged e ulung rodad, ma gathi bochan e nge m’ug ni ka gad ba fel’ ko tin ka bay e girdi’. (Fil. 2:3) Nap’an ni gad ra fanay gelngidad nge pi salap rodad ni ngad rin’ed e n’en nib m’agan’ Got ngay, ma aram e gad ra felfelan’ ni bochan e gad be fanay e pi tow’ath rodad ni ngad pininged e sorok riy ngak Jehovah, ma gathi bochan e gad be guy rogon ni nge yoor e tin gad be rin’ ngak yugu boch e girdi’ ara nge m’ug ni ka gad ba fel’ ngorad.

10. Mang fan nde puluw ni ngad taareb rogonnaged gadad ngak yugu boch e girdi’?

¹⁰ Faanra dabi kol ayuw be’ ma rayog ni nge tabab ni nga i taarebrogonnag e n’en nib salap riy ko n’en gathi rib salap be’ riy. Bod nsana bay reb e walag ni pumoon nib salap i pi’ e welthin ni fan ko yoor. Ireram e salap rok. Yugu aram rogon ma rayog ni nge lemnag ni kab fel’ ngak yugu reb e walag ni pumoon ni gathi rib salap i pi’ e welthin. Machane bin riyul’ riy e fare walag e rayog  ni manang rogon ni nga i gol ko girdi’, ma be skulnag pi fak, mab pasig ko machib. Ri gad ba tow’ath ni boor pi walagdad ni boor ban’en ni yad ba salap riy ni yad be fanay e pi tow’ath rorad ni ngar pigpiggad ngak Jehovah mar ayuweged yugu boch e girdi’!

11. Mang fan nsusun e ngad athamgilgad ni ngad folwokgad rok Jesus?

¹¹ Yugu aram rogon nsusun e dab ud taareb rogonnaged gadad ngak yugu boch e girdi’, machane boor ban’en nrayog ni ngad filed rok yugu boch e tapigpig rok Jehovah. Jesus e ir e en th’abi fel’ nrayog ni ngad filed ban’en rok. Yugu aram rogon nib flont, machane boor ban’en nrayog ni ngad filed ko pi fel’ngin nge rogon ni i rin’ boch ban’en. (1 Pet. 2:21) Nap’an ni gad ra athamgil u rogon nrayog rodad ni ngad folwokgad rok u rogon feni fel’ nrayog rodad, ma aram e rayog ni ngad mon’oggad ko pigpig ni gad be tay ngak Jehovah nge machib ni gad ma tay.

12-13. Mang e rayog ni ngad filed rok David ni Pilung?

¹² Boor e pumoon nge ppin ni yad ba yul’yul’ ni bay murung’agrad u lan e Thin rok Got nrayog ni ngad folwokgad rorad ni yugu aram rogon ndawor ra flontgad. (Heb. 6:12) Am lemnag David ni Pilung ni yog Jehovah ni ‘ir e cha’ ni ba adag,’ ma rogon ni ku nog u ba ken e Bible e ‘ir e re miti girdi’ nrib fel’ u wan’.’ (Acts 13:22) Machane David e gathi ir be’ nib flont. Ya bin riyul’ riy e, i rin’ boch e denen nib ubchiya’. Yugu aram rogon ma ke dag e kanawo’ nib fel’ nrayog ni ngad folwokgad riy. Mang fan? Ya nap’an nni yal’uweg ma de guy rogon ni nge gay e tawey rok ko kireb ni ke rin’. I m’agan’ ko fonow nib gel nni pi’ ngak mi ri kalngan’ ko n’en ke rin’. Angin ni yib riy e n’ag Jehovah fan e kireb rok.​—Ps. 51:3, 4, 10-12.

¹³ Rayog ni ngad filed ban’en rok David ni aram e ngad fithed gadad ni nge lungudad: ‘Mang e gu ma rin’ u nap’an yira fonownageg? Gu ma gur nggog e kireb rog, fa gu ma guy rogon ni nggu gay e tawey rog ko kireb ni kug rin’? Gu ma gurnageg nggon’ e kireb nga daken yugu boch e girdi’, fa? Ma gu ma athamgil u rogon nrayog rog ni nge dab kug sul u daken e oloboch ni kug rin’, fa?’ Nap’an ni ga be beeg murung’agen boch e pumoon nge ppin ni yad ba yul’yul’ ni bay murung’agrad u Bible, maku rayog ni ngam lemnag boch e deer ni bod e tiney. Taareb rogon e magawon rorad ko magawon ni ga be mada’nag, fa? Mang boch e fel’ngin nib manigil ni immoy rorad? Nap’an ni ga be fil murung’agen bagayad, mag fithem ni nge lungum: ‘Uw rogon ni nggu bod e re tapigpig rok Jehovah ney nib yul’yul’?’

14. Faan gad ra fal’eg i yaliy e n’en ma rin’ e pi walag, ma uw rogon nra ayuwegdad?

¹⁴ Gad ra fal’eg i yaliy e n’en ma rin’ e pi walag  ni kab fel’ yangarrad nge tin kar pilibthirgad, ma rayog ni nge ayuwegdad. Gur, rayog ni ngam lemnag be’ u lan e ulung rom ni be athamgil ni nge par nib yul’yul’ u fithik’ ba mit e skeng ni be mada’nag ni bod e towasar ni be yib ko girdi’ u tooben, ara togopuluw ni be yib ngak u lan e tabinaw, ara ba mit e m’ar ni ke yib ngak, fa? Bay boch i fel’ngin e cha’ney ni ga baadag ni ngam maruweliy ni nge yag ngom, fa? Faan ga ra lemnag e n’en nib fel’ ni be rin’, ma rayog ni ngam fil boch ban’en riy nra ayuwegem ni ngam athamgil u fithik’ e pi skeng ni ga be mada’nag. Ri gad ba felfelan’ ni be dag e pi walag ney e kanawo’ nib manigil nrayog ni ngad folwokgad riy u rogon ni yad be par nib gel e michan’ rorad!​—Heb. 13:7; Jas. 1:2, 3.

15. Mang fonow e pi’ apostal Paul nra ayuwegdad ni ngad ululgad ko pigpig ni gad be tay ngak Jehovah ni gad ba felfelan’?

¹⁵ Ra ngad mon’ognaged e gapas nge taareban’ u lan e ulung, ma ra bagadad mab t’uf ni nge rin’ e tin th’abi fel’ nrayog rok. Am lemnag e pi Kristiano ko bin som’on e chibog. Boor mit e tow’ath nge maruwel ni immoy rorad. (1 Kor. 12:4, 7-11) Machane de k’aringrad e re n’ey ni ngar tagenginggad ngorad ara ra yurba’gad. Ya yog Paul nra bagayad me rin’ e n’en nib t’uf ni nge rin’ ya nge yag nra ayuweged “girdien e dowef rok Kristus ngar ilalgad i yan.” I yol Paul ngak piyu Efesus ni gaar: “Faanra bayang me maruwel nrogon ni nge maruwel, ma aram mi i ilal fare dowef ma be ga’nag ir i yan u daken e t’ufeg.” (Efe. 4:1-3, 11, 12, 16) Piin nrin’ed e n’en ni yog Paul e yag ni ngar mon’ognaged e gapas nge taareban’ u lan e ulung, maku ireray e n’en gad be guy u lan e ulung rodad e ngiyal’ ney.

16. Mang e susun ni ngad dugliyed u wan’dad ni ngad rin’ed? (Hebrews 6:10)

¹⁶ Mu dugliy u wan’um ndab um taareb rogonnagem ngak yugu boch e girdi’. Ya ngam fil ban’en rok Jesus, mag athamgil ni nge m’ug pi fel’ngin rom. Mu fil ban’en rok boch e girdi’ ni bay murung’agrad u lan e Bible, nge boch e girdi’ e ngiyal’ ney nib gel e michan’ rorad. Ma nap’an ni ga be ulul ni ngam rin’ e tin rayog rom, ma nge pagan’um ngay ni Jehovah e ‘gathi ba laniyan’. Gathi bayi pag talin e maruwel ni kam ngongliy.’ (Mu beeg e Hebrews 6:10.) Mu ulul ni ngam pigpig ngak u fithik’ e felfelan’ ma dab mu pagtalin nra felfelan’ u nap’an ni be guyem ni ga be rin’ e tin rayog rom ni ngam felfelan’nag.