1. ¿Xi rucaa laanu guni sentirnu galán?

 JEHOVÁ racalaʼdxiʼ guibáninu nayecheʼ. Nánnanu zacá ni purtiʼ nácani ti cualidad stiʼ espíritu (Gál. 5:22). Ne cumu jma riuu binni nayecheʼ ora rudii que ora ricaa la? nga runi, runi sentirnu galán ora runi predicarnu ne racanenu ca hermanu (Hech. 20:35).

2, 3. a) Casi ná Gálatas 6:4, ¿xi zacané laanu cadi gusaana de chuʼnu nayecheʼ? b) ¿Xi zazíʼdinu lu artículo riʼ?

² ¿Xi zacané laanu cadi gusaana de chuʼnu nayecheʼ yaʼ? Apóstol Pablo bizeeteʼ chupa cosa ni zacané laanu chuʼnu nayecheʼ. Zeeda ni lu Gálatas 6:4 (biindaʼ ni). Primé la? ziuʼnu nayecheʼ pa gúninu ni ná Jehová de guidubi ladxidoʼno. Ne nga nga ti cosa ni naquiiñeʼ gúninu de guiranu (Mat. 22:36-38). Ne guiropa la? cadi naquiiñeʼ guchaaganu laanu né sti binni. Pa randa rúninu jma lu xhiiñaʼ Jehová purtiʼ nazaacanu, gucuaanu xiixa capacitación o nápanu xiixa habilidad la? gudiʼnu xquixe peʼ Jehová, purtiʼ laa nga racané laanu. Pa nuu tuuxa hermanu napa xiixa habilidad ni laanu qué gápanu, guiéchenu purtiʼ caquiiñebe ni para gusisácabe Jehová ne cadi para guni presumirbe ni. Lugar de guyúbinu tídinu lúcabe, jma galán guizíʼdinu de laacabe.

³ Lu artículo riʼ, zazíʼdinu xi zacané laanu para cadi guireʼnu gana, pa riníʼ íquenu qué randa rúninu biaʼ ñuuláʼdxinu ñúninu lu xhiiñaʼ Jehová. Laaca zazíʼdinu ximodo zanda iquiiñenu ca habilidad ni nápanu jneza ne xi zanda guizíʼdinu de xcaadxi hermanu.

4. ¿Xi zándaca cuee gana laanu? Bizeeteʼ ni bizaaca Carol.

⁴ Nuu hermanu riree gana purtiʼ qué randa runi biaʼ ñuulaʼdxiʼ ñuni lu xhiiñaʼ Jehová purtiʼ huará o maʼ huaniisi. Nga peʼ nga ni bizaaca ti hermana láʼ Carol, guyuu ti tiempu yegacanebe lugar ra caquiiñeʼ tu guni predicar. Bidiibe estudiu 35 binni ne gucanebe stale gaca dedicarcaʼ Jehová ne chuʼnísacaʼ. ¡Galán ngue guiráʼ ni guleendube! Peru despué guca huarabe ne maʼ qué ñanda peʼ nireebe de ra lídxibe. Sicaríʼ guniʼbe: «Nannaʼ pur huaraʼyaʼ nga qué randa runeʼ biaʼ runi xcaadxi, ne laaca pur nga runeʼ sentir cadi cayuneʼ cumplir né dxiiñaʼ de guneʼ predicar. Rireeʼ gana ora riníʼ iqueʼ ca cosa ni ñuuladxeʼ ñuneʼ ne ni randa si runeʼ». Racalaʼdxiʼ Carol guni biaʼ gándatiʼ lu xhiiñaʼ Jehová, ne galán nga ni racaláʼdxibe gúnibe. Nánnanu riene Jehová Carol ne rusisácabe ni runi.

5. a) ¿Xi cadi naquiiñeʼ guiaandaʼ laanu pa rireʼnu gana purtiʼ qué randa rúninu jma lu xhiiñaʼ Jehová? b) Casi rihuinni lu ca imagen stiʼ artículo riʼ, ¿ximodo huayuni hermanu riʼ ni ná Jehová de guidubi ladxidóʼ?

⁵ Pa nuu biaje rireʼnu gana purtiʼ qué rúninu biaʼ ñuuláʼdxinu ñúninu galán guiníʼ íquenu ndiʼ: «¿Pabiáʼ ribeza Jehová guneʼ lu xhiiñaʼ?». Ribézabe gúninu ni nabe de guidubi ladxidoʼno o gúninu biaʼ zanda gúninu lu xhiiñabe. Guníʼ ique ndiʼ. Ti hermana ni napa 80 iza riree gana purtiʼ maʼ qué randa runi predicar biaʼ bíʼnini dxi napa 40 iza. Riníʼ íquebe, neca cayúnibe ni ná Jehová de guidubi ladxidoʼbe, peru cadi cayuulaʼdxiʼ Jehová biaʼ cayúnibe. Peru ¿ñee dxandíʼ nga la? Pa biʼniʼ hermana riʼ ni ná Jehová de guidubi ladxidóʼ dxi napa 40 iza ne cayúnirube ni yanna ra maʼ nápabe 80 iza, ndiʼ riníʼ qué huasaana de gúnibe ni ná Jehová de guidubi ladxidoʼbe. Pa riníʼ íquenu qué riuulaʼdxiʼ Jehová biaʼ rúninu, cadi guiaandaʼ laanu laasibe nga zanda guiniʼbe pa riuuláʼdxibe ni o coʼ. Pa gúninu ni nabe de guidubi ladxidoʼno, zábibe laanu: «Biaʼsi ni bíʼniluʼ» (bichaaga ni né Mateo 25:20-23).

6. ¿Xi rusiidiʼ ni bizaaca María laanu?

⁶ Ti cosa ni zacané laanu chuʼnu nayecheʼ nga guicá íquenu ca cosa ni zanda gúninu, lugar de guiníʼ íquenu ca cosa ni qué zanda gúninu. Guiníʼ íquenu ni bizaaca ti hermana láʼ María, pur huarabe la? maʼ qué randa runi predicarbe biaʼ ñuuláʼdxibe ñúnibe ni. Guyuu ora guyuube triste ne guníʼ íquebe qué risácabe. Despué, bidiibe cuenta nuu ti hermana ndaaniʼ congregación stibe laaca huará. Ngue runi biyúbibe modo gacanebe laa. Sicaríʼ guníʼ María: «Gudixheʼ iqueʼ chaaʼ ra lídxibe para guneʼ predicarniaʼ laabe pur teléfono ne pur carta. Guizáʼ riecheʼ ora ribiguetaʼ ra lidxeʼ purtiʼ gunda gucaniáʼ hermana riʼ». Laanu laaca zanda chuʼnu nayecheʼ pa guicá íquenu ca cosa ni zanda gúninu lugar de guiníʼ íquenu ca cosa ni maʼ qué zanda gúninu. Peru, pa randa rúninu jma o pa nápanu xiixa habilidad. ¿Xi zanda gúninu yaʼ?

7. ¿Xi conseju bidii apóstol Pedro ca hermanu?

⁷ Lu primé carta ni bicaa apóstol Pedro, guluube gana ca hermanu iquiiñecaʼ habilidad o gracia ni nápacaʼ para cuʼcaʼ gana xcaadxi. Sicaríʼ bicaabe: «Cada tobi iquiiñeʼ biaʼ gracia ni maʼ gucuaa para gacané xcaadxi, ne zacá zahuinni jneza caquiiñeʼ gracia ni rudii Dios  laa pur guendanachaʼhuiʼ stiʼ» (1 Ped. 4:10). Cadi naquiiñeʼ guiníʼ íquenu qué zaquiiñenu habilidad ni nápanu purtiʼ ridxíbinu gapa ca hermanu envidia laanu o guireecaʼ gana. Pa gúninu nga la? qué zudíʼdinu Jehová guiráʼ ni nápanu.

8. Casi ná 1 Corintios 4:6, 7, ¿xiñee cadi naquiiñeʼ guni presumirnu ca habilidad ni nápanu?

⁸ Galán iquiiñenu ca habilidad ni nápanu, peru chuʼnu cuidadu cadi guni presumirnu (biindaʼ 1 Corintios 4:6, 7). Guzéʼtenu ti ejemplu, pa guizáʼ nagueenda ridxélaluʼ estudiu la? ¡Cadi gusaana de gúniluʼ ni! Peru, maʼ gadxé nga iquiiñenu xiixa habilidad nápanu ne maʼ gadxé nga guni presumirnu. Guníʼ ique gúpaluʼ ti experiencia galán ra cayuni predicarluʼ ne bidxélaluʼ ti estudiu. Nga runi, guizáʼ maʼ racaláʼdxiluʼ gábiluʼ grupu de predicación stiluʼ guiráʼ ni bizaacaluʼ. Peru, ora maʼ nuuluʼ ra nuu grupu stiluʼ, bizulú ti hermana caníʼ bisaana ti revista ra nuu ti binni. Hermana riʼ bisaana ti revista, peru lii bizululuʼ ti estudiu. ¿Xi zúniluʼ yaʼ? Nánnaluʼ pa guiniʼluʼ experiencia stiluʼ zaguu ni gana grupu que, peru zándaca guiníʼ íqueluʼ mejor sti biaje guiniʼluʼ ni para cadi chu hermana ni bisaana revista que triste. ¡Guizáʼ galán pa gúniluʼ nga! Peru, cadi gusaana de guyúbiluʼ estudiu, purtiʼ nápaluʼ habilidad ca.

9. ¿Ximodo zanda iquiiñenu ca habilidad ni nápanu?

⁹ Cadi guiaandaʼ laanu pa nápanu xiixa habilidad la? Dios nga bidii ni laanu. Nga runi iquiiñenu ni para cuʼnu gana ca hermanu de congregación, ne cadi para guni presumirnu (Filip. 2:3). Ora riquiiñenu stipa stinu ne ca habilidad ni nápanu para gúninu ni ná Dios, riuʼnu nayecheʼ. ¿Xiñee yaʼ? Purtiʼ caquiiñenu guiráʼ ni nápanu para gusisácanu Jehová, ne cadi para tídinu lú xcaadxi o guiníʼ íquenu jma risácanu que laacaʼ.

10. ¿Xiñee cadi jneza guchaaganu laanu né xcaadxi?

¹⁰ Pa qué gápanu cuidadu la? zándaca guchaaganu ni randa rúninu né ni qué randa runi xcaadxi. Guzéʼtenu ti ejemplu. Zándaca guizáʼ nanna ti hermanu gudii discursu públicu. Nga nga habilidad stibe. Peru zándaca guiníʼ íquebe jma risácabe que ti hermanu ni raca nagana para laa gudii discursu. Peru hermanu riʼ runi xcaadxi cosa, zándaca nabé hospitalariu laa, jneza cusiniisi ca xiiñiʼ o nabé runi predicar né stale gana. Guizáʼ riéchenu purtiʼ nuu stale hermanu ne hermana  ni riquiiñeʼ habilidad ni napa para guni ni ná Jehová ne gacané xcaadxi.

11. ¿Xiñee naquiiñeʼ gúninu stipa chinándanu ejemplu stiʼ Jesús?

¹¹ Cadi galán diʼ nga guchaaganu ni rúninu né ni runi xcaadxi, peru rizíʼdinu stale ora rinándanu ejemplu stiʼ xcaadxi xpinni Jehová. Guiníʼ íquenu ejemplu bisaana Jesús para laanu. Neca cadi perfectu laanu casi laabe, peru zanda guizíʼdinu de ca cualidad ni bisihuínnibe ne modo biʼniʼ tratarbe binni (1 Ped. 2:21). Pa gúninu stipa chinándanu ejemplu stiʼ Jesús dede ra gándatiʼ, jma zusihuínninu ca cualidad stiʼ ca xpinni Jehová ne zabeendunu ni galán ora guni predicarnu.

12, 13. ¿Xi rizíʼdinu de ejemplu stiʼ rey David?

¹² Lu Biblia riete ejemplu stiʼ stale hombre ne gunaa, neca binni ruchee laacaʼ, nácacaʼ ti ejemplu galán para laanu (Heb. 6:12). Tobi de laacabe nga rey David. Sicaríʼ guníʼ Jehová de laabe: «Maʼ bidxelaʼ [...] ti hombre ni rusiecheʼ ladxiduáʼ» (Hech. 13:22). Peru cadi perfectu guca David. Purtiʼ guyuu ora biʼniʼ cometerbe pecadu grave. Neca zacá, bisaanabe ti ejemplu galán para laanu. ¿Xiñee yaʼ? Purtiʼ dxi biʼniʼ corregírcabe laabe, qué nireenebe pretextu, sínuque gucuaabe disciplina que ne guca arrepentirbe de guidubi ladxidoʼbe. Ngue runi biʼniʼ perdonar Jehová laabe (Sal. 51:3, 4, 10-12).

¹³ Zacané ejemplu stiʼ David laanu pa guiníʼ íquenu ca pregunta riʼ: «¿Ximodo ricaaʼ conseju ni gudiicabe naa? ¿Nagueendaca rudieeʼ cuenta dxandíʼ bicheeʼ la? o ruyubeʼ pretextu? ¿Ñee primeca ni runeʼ nga ugaaneʼ donda ique xcaadxi la? ¿Runeʼ stipa cadi ibiguetaʼ gucheeʼ la?». Galán gúninu ca pregunta riʼ ora guni estudiarnu modo bibani ca hombre ne gunaa ni bisaana ti ejemplu galán ni riete lu Biblia. ¿Ñee bidxaagalúcabe guendanagana casi ni napaʼ la? ¿Xi cualidad bisihuínnicabe? Cada biaje guni estudiarnu, guiníʼ íquenu: «¿Ximodo zanda chinandaʼ ejemplu stiʼ xpinni Jehová riʼ?».

14. ¿Xi ribeendunu ora rinándanu ejemplu stiʼ xcaadxi xpinni Cristu?

¹⁴ Laaca zanda guizíʼdinu stale de ca hermanu ni nahuiiniʼ ne ca ni maʼ huaniisi. Zándaca guiníʼ íquenu tuuxa hermanu de congregación stinu ni cusihuinni napa fe neca napa ti guendahuará o cucaa xcaadxi joven laa o familia stiʼ guni ni cadi jneza. ¿Ñee cusihuinni hermanu ca cualidad  ni naquiiñeʼ chinándanu para guni mejorarnu la? Pa chinándanu ejemplu stícabe, zazíʼdinu cosa ni zacané laanu gudxíʼlunu ca guendanagana stinu. ¿Cadi dxandíʼ rusisácanu ejemplu stiʼ ca hermanu ca la? Racané ejemplu stícabe laanu para chuʼnu nayecheʼ (Heb. 13:7; Sant. 1:2, 3).

15. ¿Xi conseju bidii Pablo zacané laanu gúninu ni ná Jehová né guendanayecheʼ?

¹⁵ Pa guiranu gúninu ni ná Jehová de guidubi ladxidoʼno, zacanenu chuʼ congregación tobi si. Nga nga ni biʼniʼ ca xpinni Cristu ni bibani lu primé siglu. Gúpacabe gadxé gadxé habilidad ne responsabilidad (1 Cor. 12:4, 7-11). Peru neca zacá qué nuyúbicabe nidíʼdicabe lú xcaadxi, sínuque gudxi Pablo laacabe lu carta ni bicaa para ca xpinni Cristu de Éfeso, cada tobi de laacabe «gacané congregación stiʼ Cristu guzuhuaa chaahuiʼ». Ne laaca guniʼbe: «Pa jneza gúninu dxiiñaʼ ni maʼ gucuaanu la? cada dxi zácanu jma nadipaʼ ne zannaxhiisaanu» (Efes. 4:1-3, 11, 12, 16). Ni yenanda ca conseju stiʼ Pablo gucanecaʼ chuʼ congregación tobi si, ngueca nga rizaacaʼ ndaaniʼ ca congregación nuu tiempu riʼ.

16. ¿Xi zanda quixhe íquenu gúninu? (Hebreos 6:10).

¹⁶ Quixhe íquenu cadi guchaaganu laanu né xcaadxi hermanu. Lugar de nga la? chinándanu ejemplu stiʼ Jesús ne gúninu stipa gusihuínninu ca cualidad stiʼ. Chinándanu ejemplu stiʼ ca xpinni Dios ni bibani dxiqué ne ca ni nabani tiempu riʼ. Biʼniʼ ni ná Jehová de guidubi ladxidoʼloʼ, ne cadi guiaandaʼ lii «jneza runi Dios ne qué zusiaandaʼ guiráʼ» ni maʼ bíʼniluʼ pur laa (biindaʼ Hebreos 6:10). Cadi gusaana de gúniluʼ ni ná Jehová né guendanayecheʼ, ne cadi guiaandaʼ lii rusisácabe guiráʼ stipa ni rúniluʼ para gusiécheluʼ laabe.