1. Ginipai nafu bakere ngbarago furani gbe?

 YEKOVA naida ani du na ngbarago. Ani naino gipai re mbiko ngbarago nga papara zuzu gako ziazia toro. (Gara. 5:22) Wa duhe nga bakere ngbarago du ti fuhe susi diaha, ani nadu na bakere ngbarago ho ani afu tirani ni kakaka ka mangasunge tungusapai na ka undo awirinarani rogo dungu agene.​—Amo. 20:35.

2-3. (a) A wa duhe rogo AGaratio 6:4, gini apai ue nika undo rani ani nye kindi na ngbarago ti ngba ga Yekova sunge? (b) Gini apai ani nika sakapai tipaha rogo gi kekeapai re?

² A wa duhe rogo AGaratio 6:4, gu mokedi nangia Pauro agumba pa apai ue nga gu nika undo rani ani nye kindi na ngbarago. (Oni gedihe.) Bambatapai nga, si naida gaani sasa du nga ka fu guhe fu Yekova ngba gbe ringbisihe kuti omerani. Ka ani aafu guhe fuko ngba gbe ringbisihe kuti omerani, ani nika duadu na ngbarago. (Mt. 22:36-38) Uepai nga, si naida ani ne ringbisa tirani na kura aboro. Si naida ani du na tambuahe fu Yekova, ka si du nga ani na rengba ka mangapai mbiko kpotorani wenengai, gu rabahe ani nagbiaha, watadu gu birĩ-inohe du ani na ni tipa ka mangapai. Gu garakaha agaraka berewe gbe nga, agu ahe dunduko du berani kina ko nafuhe furani. Ono tie, ka si du nga kura aboro nagbia wene sangbanapai ti kura asunge nga ga tungusapai susi gu ani agbiaha, si naida ani du na ngbarago nga i namangasunge na gayo abirĩ tipa ka tambua Yekova, angianga i namangasunge na ni ka sa gupai nga i ngba ti kura aboro watadu tipa gu nduapai nga ga gbangbati ya. Sidu tie, kuba gupai nga kaa manga abaangirã na yo, si naida ani wirikipai be yo.

³ Rogo gi kekeapai re, ani nika bi gupai rengbe ka undo rani ho du ani ni na gberãrago bambiko ani arengbanga ka manga agu apai dunduko ani aida ka mangaha te. Ani nika makia pai a tipa wai rengbe ani ka mangasunge na ai agu abirĩ rengbe ani kadu na ni na gupai rengbe ani ka wirikaha ti agu akpiapai nga ga kura aboro.

4. Gini apai rengbe ka sa agu akura rani ani du na gberãrago? Oni funga kpiapai.

⁴ Agu akura rani kina ho arengbanga ka manga agu apai dunduko ani akpinyemu ka mangaha ti ngba ga Yekova sunge ya mbiko ani ima gbinza watadu ani na kaza, na gipai re nasa rani ani du na gberãrago. Gure du nga gupai naadu tipa Carol. Ri anaatungusapai rogo agu aba naadu na bakere zingo rogoho tipa abatungusipai. Ti agu aregbo re, ri anaawirika Baibiri na aboro nga 35 na ri ki undo dunguyo i mangi sonakumbatayo ki kpara gayo raka fu Yekova na ki zi bapatiza. Carol aima gbia wene sangbanapai ti gari sunge tungusapai! Tifuo gure, ri ati na kaza nikerehe, na badungu aregbo si anaaida ri naasungo kina kporo. Carol aya: “Mi ima ino gupai nga mbiko pa kaza re, mi na rengba ka manga gupai kura aboro amangaha te, ono mi nabi tire nga mi niruru re wa gu du yo te. Gere nga gu vura du dagba nyemupai na ndikidipai na si ima du ni kpakarakpakaraha ka hihe.” Carol naida ka manga agu apai dunduko rengbe omeri na ni fu Yekova. Nirengo, ani na bakere tambuahe tipa gupai re! Ani ima rengba kadu na gu kido nga gaani Mbori nunga ima du na tambuahe tipa gi gari wenesino re.

5. (a) Ginipai si aida ani tingidihe ka si du nga ani na gberãrago mbiko ani arengbanga ka manga agu apai ani aida ka mangaha te? (b) A wa ani abihe rogo asura, waigu wirina andu kindi kumbatayo kaa fu guhe ngba gbe ti ngba ga Yekova sunge?

⁵ Ka si du nga ti kura aregbo, kurapai kinaho adunga mo na rengba ka mangaha ya, mo sana tiro nga, ‘Ginipai Yekova akpinyemuhe bere?’ Yekova naida mo mangi gupai ngbaangba ringbisihe kuti gupai du tipa ro awere. Oni berẽnga kurii gipai re: Wirina du garã ri nga 80 na gberãrago mbiko ri arengbanga ka manga bakereapai ti ngba sunge tungusapai wa gu ri anaamangaha ho garãri adu ni nga 40 te. Ri naberã gupai nga wa ri avura kaa fu guhe du ni wenehe, si afunga ngbarago fu Yekova te. Ono ya mo rengo du nzunzu nga gupai re? Oni berẽnga kuriihe. Ka si du nga gi wirina re anaafu guhe ngbaangba ho garãri adu ni nga 40, na ri nafu guhe kindi ngbaangba wa du garãri nga 80 awere, naida ka ya ri ata mbunga fu guhe du ni wenehe te. Ka ani tona kaa berã gupai nga ani amanganga gupai rengbe arengba tipa ka sa ngbarago ti Yekova te, si naida ani tingidi gupai nga Yekova du nadiaberã tipa bakio gupai ngba tiko. Ka ani mangi gupai rengbe omerani na ni, Yekova nika ya furani ni sangbanaha wẽ: “Mo mangi he wenengai.”​—Oni ringbisinga ha na Matayo 25:20-23.

6. Ginipai rengbe ani ka wirikaha ti ga Maria kpiapai?

⁶ Si ima rengba kadu furani taata ani du na ngbarago ka si du nga ani nikaa maaberã rani gbe tipa gupai rengbe ani ka mangaha kuba gupai nga kaa berã gbe tipa agu apai ka ani amanganga ha ya. Ani wisigingo pai tipa gu wirina du rimori nga Maria, nga guri nambu be gu kaza nasari ka ri dunga na rengba ka manga bakereapai ti ngba gari sunge tungusapai ya. Ti bambataha, ri aima du na bakere gberãrago na kini bihe nga sunge tiri te. Ono tifuo gure, Maria aberẽpa gu wirina naadu rogo gari dungurati naaguaringa ba ri ya, na ri adiberã tipa ka undo. Maria aya: “Mi amangi mbakadapai tipa kaa tungusapai na ri rogo terefuni na rogo keka awaraga. Ti agu aregbo dunduko ani anaamangasunge kina sa, mi aniga ku kporo yo kidu na ngbarago gbiati rengbabepai nga mi niima du na rengba ka undo wirinina.” Ani ima rengba a ka kiiso gaani ngbarago ni maaberã rani gbe tipa agu apai du ani na rengba ka mangaha angianga agu ka ani amanganga ha ya. Ono na ka si du nga ani na rengba ka manga bakereapai watadu ani namanga wenengai rogo kura abangiriba ti ngba ga Yekova sunge?

7. Gini arugute rogo mangimangipai yo gu mokedi nangia Petero afuhe fu aKristano?

⁷ Rogo gu bambata waraga nga ga gu mokedi nangia Petero, ko angarasi awirinako i  mangisunge na ai agu abirĩ gbiati tandu mangaapai i adu na ni tipa ka ngarasa akurayo aidipase. Petero akepai nga: ‘Wa i agama he fu boro kina wo a ni mangi pa akurani na ni, wa wene babanda gu dungu agamahe nga ga Mbori.’ (1 Pet. 4:10) Si naida ani mangisunge wenengai na agu abirĩ mangaapai du tirani na ka ani abakanga bangirani nga kura aboro nika kpihe watadu rago nika gberã tiyo ya. Ka si du nga ani amanganga gupai rengbe omerani na ni te bambiko ani nabakabangirani tipa wai kura aboro nika berã, ani funga guhe fu Yekova ngba kisusi te.

8. Ringbisihe kuti 1 AKorindo 4:6, 7, tipagine si aida ani ne tangbaduse ti ni tipa agu abirĩ du ani na ni?

⁸ Si naida ani mangisunge na agu abirĩ du tirani ni bakerehe gbe, ono si naida ani du na rubangirise tipa ka zanga ta ngbadurani tipaha. (Oni gedi 1 AKorindo 4:6, 7.) Ni kpiapai, mo ima rengba kadu ni gu boro niima ino wai ka tona wisigo Ziazia Kekeapai na aboro rogo akpuyo. Si naida mo mangisunge amanga na gu birĩ re! Ono pa mangasunge na birĩ nga kurapai kia na pa ta ngbaduse tipaha nga kurapai a kia. Ani yanga barambeda, wenepai mangi foro gene tungusapai yo na mo ki tona wisigo Ziazia Kekeapai na boro. Mo na nyemu ka pe gipai re fu gu badona nga ga tungusapai du mo rogoho. Ono tie, ho mo nagbia gu badona re ni, mo bi gupai nga wirina nape pa gupai nimangi furi nga gu nisa gupai nga ri fu magazini. Ri tigari nifu magazini; na mo tigamo ki tona wisigo Ziazia Kekeapai na boro. Ginipai mo nika mangaha? Mo ima ino gupai nga badona nika gbia ngarasaro agbia ti gamo kpiapai, ono mo ima rengba ka diaberã tipa ka pido gu kura wene regbo tipa ka pe gamo, bambiko mo aidanga ka gberesapa gu ngbarago nga ga gu wirina nifu magazini te. Si nga gu wenepai si aida boro mangihe. Ono ka mo ya mbunga wisigo Baibiri na aboro ya. Mo mangisunge na gu birĩ du mo na ni!

9. Waigu si aida ani mangisunge na agu abirĩ du tirani?

⁹ Si naida ani tingidi gupai nga, gu tandu mangaapai kadu tirani si nga gamahe be Mbori. Si naida ani mangisunge na gaani birĩ ka nyakasa dungurati, angianga ka manga tirani nga ani nga wene aboro ya. (Frp. 2:3) Ho ani amangasunge ni na gaani ome gbiati agu abirĩ du tirani tipa ka manga gupai Mbori akpinyemuhe, ani nadu na ndupai tipa kadu na ngbarago​—angianga bambiko ani namanga bakere apai kisusi kura aboro watadu ani naasada parani du kuari tiyo ya, ono bambiko ani namangasunge na gaani abirĩ tipa ka sambuo Yekova.

10. Tipagine si arẽnga ti ni tipa ani naaringbisa tirani na kura aboro ya?

¹⁰ Ka boro adunga na rubangirise ya, ni ima rengba ka tona kaa ringbisa gupai du ni na rengba ka mangaha ni wenehe kuti gupai kura aboro adunga na rengba ka mangaha ni wenehe ya. Ni kpiapai, wirina ima rengba kaa manga bawene  agumbapai. Gure du nga gupai du ni na rengba ka mangaha ni wenehe. Ono ni ima rengba ka berã gupai nga, ni nyakipa ni ti gu wirina ainongo manga agumbapai wenengai ya. Ono gu wirina ainongo manga agumbapai wenengai re ya ima rengba kadu na gu sino tini nga ga dia aboro kugume, ka raba awirini, watadu kadu zaaza gene tungusapai yo. Nairiwo gu bakere tambuahe du ani na ni nga ani na badungu awirina du na inohe nga aguyo namangasunge na gayo abirĩ tipa ka iriso Yekova na ka undo kura aboro!

11. Tipagine si aida ani asadi ti ni ka pekafuo ga Yesu kpiapai?

¹¹ Wa vura duhe nga si naida ani ne ringbisa tirani na kura aboro, ani ima rengba ka wirikapai ni bakerehe be kura ga Yekova amoyambu. Gu boro nga bawene kpiapai rengbe ani ka wirikapai be ni nga Yesu. Wa vura duhe nga ko angia rengberengbe boro, ani ima rengba ka wirikapai ti gako wenewene asino na gako agene. (1 Pet. 2:21) Ho ani amanga ome ni tipa ka pekafuo gako kpiapai ni wenengai a wa rengbe omerani na ni, ani nada ni ga Yekova wene amoyambu na kini gbia wene sangbanapai gene tungusapai yo.

12-13. Ginipai rengbe ani ka wirikaha be Bakindo Davide?

¹² Rogo Fugo Mbori yo, ani nabi badungu akpiapai nga ga akumba na adee nga aguyo ani naima rengba ka wirika yo si ki vura du vurũ nga i angia kpakpa aboro. (Eb. 6:12) Oni berẽnga pa Bakindo Davide, nga guko Yekova aya tipa ko ko nga gu kumba “du kpotoko yo wa gu mi akpi nyemu he,” watadu wai kura fugo Baibiri sa namoihe, “nga gu ngbatunga boro nasa ngbarago tire gbe.” (Amo. 13:22) Ono tie, Davide angianga rengberengbe boro te. Ni rengo, ko aima manga kura aingahe. Wa vura duhe wo, ko nga wene kpiapai furani. Tipagine? Bambiko ho i aruguko ni, ko aasadanga ka rugusa pai kubarako yo te. Kuba gure, ko adi gu nyanyaki rugute i afuhe fuko kugume na rago ki gberẽ tiko tipa gupai ko amangihe. Ni sangbanaha, Yekova ambupai fuko.​—Tam. 51:3, 4, 10-12.

¹³ Ani rengbe ka wirikapai be Davide nisana ani tirani nga: ‘Waigu mi naamangapai ho i afu arugute ni fere? Ya mo mi naainopa gimi aingahe niipo, watadu mi naasada ka rugusapai kubara re yo? Ya mo mi naabira kina kura aboro niipo? Ya mo mi naamanga asadatise nyanyaki tipa ka zanga dogoda manga kina agu aingahe re berewe?’ Mo ima rengba ka sana tiro na kina ngbatunga asanahe wa gure ho mo agedapai ni tipa gu ruru akumba na adee du payo rogo Baibiri yo. Ya mo i agbiatiyo na ngbatunga akpakarapai wa gu mo agbia tiro na ni? Gini wenewene asino i ayuguhe? Rogo agi abangiriba re, mo sana tiro nga: ‘Waigu rengbe mi kadu gbe wakina gi ruru moyambu nga ga Yekova ni re?’

14. Waigu rengbe ani ka gbia undo ni kparia ani akuarani aidipase?

 ¹⁴ Ani ima rengba a ka gbia undo nikparia ani akuarani aidipase, gu parangayo na gu sosono yo. Ni kpiapai, ya mo mo rengbe ka berãpa boro rogo gamo dungurati nga gu ni nahi kpakarapai niruru ni​—isoke sosodahe, sogote be aborokporo watadu kaza kpotose? Ya mo mo nabi wenewene asino ti gu boro re nga gu mo aida ka sonosaha ni bakerehe gbe? Niwisigo mo gani wene kpiapai, mo ima rengba ka wirika gu kura agene rogo mangimangipai yo tipa wai ka hi gamo kpakaraapai. Nairiwo wai du ani na bakere tambuahe nga agi awirina re ima maa wene akpiapai furani nga ga idapase si aida ani pekefuoho​—ni rengo, si nga pangbarago!​—Eb. 13:7; Yak. 1:2, 3.

15. Gini rugute gu mokedi nangia Pauro afuhe nga gu rengbe ka undo rani ani naandu kindi kumbatayo kaa gbia ngbarago ti ngba gaani sunge fu Yekova?

¹⁵ Tipa kadu na zereda gbiati kodatise rogo dungurati, ani dunduko nibasasa si aida ani fu guhe ngba gbe. Oni bingo gupai nadu tipa agu aKristano nadu rogo bambata sa kama agarã. I adu na dungu ngbatunga abirĩ gbiati asunge ni bakiakia. (1 Kor. 12:4, 7-11) Ono gipai re aasanga gupai nga i naamanga abaangirã kini ye na kparakaro te. Kuba gure, Pauro angarasi aboro dunduko i mangi gupai si aidaha, “sa sonosa boro Kristo.” Pauro akepai fu aEfeso nga: Ka “borose azunguda tihe dunduko nzunzu ki du ngungungu . . . si nakiisa borose sa sonosa tihe rogo nyemuse yo.” (Ef. 4:1-3, 11, 12, 16) Agu aboro namangaha wo i nasonosa zereda gbiati kodatise​—nga agu asino ani abihe rogo gaani adungurati areme.

16. Ginipai si aida ani diberã ka mangaha? (AEbere 6:10)

¹⁶ Mo diberã ka ne ringbisa tiro na kura aboro. Kuba gure, mo wirikipai be Yesu, na ki mangi asadatise ka pekafuo gako asino. Mo gbia undo ti agu akpiapai nga ga idapase nga ga agu aboro du payo rogo Baibiri yo na aguyo du ti gi gaani regbo re. Wa oni nikaa ndu kindi kumbatayo kaa manga gupai rengbe omeroni na ni, oni du na gu kido nga, Yekova ni iraira ko te “bangiriko ago nga ti gaoni sunge te.” (Oni gedi AEbere 6:10.) Oni naandu kindi kumbatayo kaa gbia ngbarago ti mangasunge fu Yekova, na oni ini gupai nga ko na tambuahe tipa gu ome oni amangaha tipa ka sa ngbarago tiko.