“Abugbaanhaạn phọ u/zoọm ghan eyoghoyoghọ eten we bịn kuolọ ghalhamọ r’asuogh phọ amhị. Ḍiniin aḍio, Elaine, opọ amheeraạm bọ kạt phọ angọ ni akikiạ iyạl asuogh amhị. Emhiigh k’aḍio phọ aḍiphẹ phọ, torobọ amem dị yoor roten siphẹ phọ, asuogh phọ amhị iwạ ghan oghị agạ phọ bidị eteẹny bọ akikiạ phọ elhe.’

“Arunwanyụ eru eten. Asuogh phọ ighelhọm ghan akikiạ phọ kụ mị aghelhọm ghan raghaạph Abugbaanhaạn phọ. Kuolọ mị u/wạ oḍigh arighirị r’abidị. Mị mapel li 70 asiạ, kuolọ mị u/kạr ghan ulegheri omheeraam Abugbaanhaạn phọ. Loor esi dị iḍighinhom araraạr arutu asiosị phọ imhị i/ḅeraạn, kụ mị uutughiạn mọ kenighẹ ghụn dị ogina amhị bịn kụ katuughạ Baibul phọ.

“Mem mọ amuphẹ phọ, mị umhiịn ghan ni bunhọn Abugbaanhaạn dị omheeraạm ghan kạt phọ kirokirọ arughulhukụl siphẹ emhạ phọ ayoor. Bidị phọ kẹn unhighẹ ezọ. Bidị uphanyanhaạn sipuru aBaibul phọ amhị, kụ iphẹn phọ ikọm idị mị aḍuom bidị olhoghi.

“Ḍiniin aḍio, Elaine upuru ni imhị mọ, ‘Nạ ameeraam ni mọ inhạm eḍighi inmo k’Enhaạn?’ Kụ mị aphagharanhaạn mọ, ‘Ii, mị ameeraam ni!’ Kụ Elaine aalhanhaạn imhị Isaiah 11:6-9. Emhiigh k’aḍio phọ aḍiphẹ phọ, mị uwạ ni otuughạ aBaibul phọ, kuolọ mị u/meera ghan usighẹ rinyạ Abugbaanhaạn phọ.

“Siḍio phọ edaphạn bọ siphẹ, mị ughelhọm ni raghaạph aBaibul ḍighaạgh Elaine r’olom odị, Brent. Orue onhaghanhạn iyaạr dị oḍighi onyọ aKristẹn remạ ghan, bidị uḅenhị imhị aạl aḍinyạ aMatiu kụ eghị esi Iiḍighi phọ. Mị aạl li. I/bia bịn mị amheera dị aBrent r’Elaine kutughemhị imhị Baibul phọ. Mem mọ amuphẹ phọ iḍighi ogbo 2016.

“Mị uphogh ghan aghiọm ghisigh torobọ awiki otuughạ aBaibul phọ r’oghị ghan ituughạ siphẹ aKindọm Họl phọ. Mị ukạr kụ alhoghoma ḍisẹph r’oḅaạl olhoghi otuughạ ipẹ aBaibul phọ akạr bọ atughemhị. Alhạ reten bịn mị aḍiiny muụm aḍighi onyọ Ogbaanhaạn. Nyiidiphọ mị mamhạn 79, kụ mị alegheri ni mọ mị maḍigh ekạr egey eten phọ. AZihova musẹph imhị esi olhoghonhaạn amhị ḍighaạgh oḍighom aani eghunotu awe dị oḅọgh loor ongọ Enhaạn.”