“Jumulembene gibed ginyutho bero ni dhanu kende ngo, ento ni gwogi para bende. Ceng’ acel, nyamego Elaine m’ucungo i ng’et prezantwar umiyo biskwit ni gwogi para ario. I ng’eye, tek wawok ceng’ini ku prezantwar ka moko ci, gwogi kwong’o telo thol gitund i bang’ Jumulembe pi ninwang’u ‘biskwit migi.’

“Biskwit ma Jumulembe ugam umiyo unyang’u gwogi para lee, an ke nyathi wec ma nok ma waweco kugi re m’unyang’a. Re amito ngo amedara niweco kugi akeca. Abino ku oro ma kadhu 70, re nwang’u fodi ang’eyo ngo pi yiyoyic mi Jumulembe pa Yehova. Calu ma lembe mi dini ma pol udaru turo cwinya, uketho aparu nia mito aponj Biblia gira kenda i pacu.

“I kind nindo maeno, aneno Jumulembe ucungo kaka ma tung’ tung’ i i adhura mwa ku prezantwar migi i ng’etgi. Gin de gitie ku wang’ mir anyong’a. Gibed gidwoko wang’ penji para ceke niai kud i Biblia. Lembuno uketho acaku genogi.

“Ceng’ acel, Elaine upenja kumae: ‘Nyo ing’eyo de nia ley utie giramiya m’uai i bang’ Mungu?’ Adwoko nia ‘Eyo, ang’eyo cuu dit!’ I ng’eye esomo ira Isaya 11:6-9. Saa maeno abed amito aponj lembe iwi Biblia, re asu abed amito ngo agam girasoma moko ci i bang’ Jumulembe pa Yehova.

“Nindo moko i ng’eye, wec ma nyar adundo re ma pire tek ma waweco kud Elaine man won ot pare Brent unyang’a lee. Gikwaya nia adok asom buku pa Matayo zoo nitundo i Tic mi Jukwenda kara anyang’ i gin ma Jukristu mandha gicikiri nitimo. E adok atimo calu ma giyero. I ng’ey nindo ma nok, acaku ponjo Biblia ku Brent man Elaine. Ubino i diere mi oro 2016.

“Abed akuro kud ava nindo mi ponji para mi Biblia ma kubang’ yenga man coko ma wabed watimo i Ot Ker. Abedo kud anyong’a lee dit ning’eyo lemandha ma Biblia ubeponjo. I ng’ey oro moko nyanok ci alimo batizo. Kawoni atie ku oro 79, man anyong’a ubenega lee pilembe anwang’u dini mandha. Yehova ukonya nidoko acel m’i kind jurutic pare i wang’ ng’om zoo.”