“Ba Nte bali ne cikuuku ku bantu e lyo na ku tubwa twandi. Bushiku bumo, ba Elaine abalebombela pali kastandi ka kubikapo impapulo balipeele utubwa twandi amabisiketi. Ukutula lilya, lyonse nga twaya tulepalamina apo ba Nte balebika kastandi ka kubikapo impapulo, utubwa twandi twaleya kuli ba Nte pa kuti batupeeleko amabisiketi.

“Palipitile imyeshi ukutula apo natendekele ukutwala utubwa mu kwenda. Utubwa twalefwaya fye ukuya mu kulya amabisiketi kuli ba Nte e lyo na ine naletemwa ukulanshanya nabo pa nshita iinono. Lelo nshalefwaya ukulalanshanya nabo pa nshita iitali. Nalicilile imyaka 70 kabili nshaishibe ifyo ba Nte basuminamo. Apo nshatemenwe ifyo balesambilisha mu macalici ayengi, natontonkenye ukuti nalingile fye ukulaisambilisha Baibolo ne mwine.

“Pali iine nshita, nalemona ba Nte na bambi nabeminina pa tumastandi twa kubikapo impapulo mu ncende shalekanalekana isha musumba. Nabo bene lyonse baleba ne cikuuku. Lyonse baleasuka ifipusho nakwete ukubomfya Baibolo kabili ici calengele ntendeke ukubacetekela sana.

“Bushiku bumo ba Elaine banjipwishe ukuti: ‘Bushe mwalishiba ukuti inama bupe ubo Lesa atupeela?’ Nabaswike nati: ‘Ee nalishiba!’ Lyena bambelengele Esaya 11:6-9. Ukufuma ilya inshita nalefwaya ukusambilila Baibolo nangu ca kuti nshalefwaya ukupokako impapulo ku Nte sha kwa Yehova.

“Ukutula bulya bushiku, nalitemenwe ukulalanshanya ifya mu Baibolo na ba Elaine na bena mwabo ba Brent. Banjebele ukubelenga Baibolo ukutendekela pali Mateo ukufika mwi buuku lya Imilimo pantu balefwaya naishiba ifyo cipilibula ukuba Umwina Kristu. E ico nalitendeke ukubelenga. Tapakokwele nalisumine ukusambilila Baibolo na ba Brent e lyo na ba Elaine. Ifi fyacitike mu lusuba lwa mu 2016.

“Nalefwaisha sana ukulasambilila cila mulungu e lyo no kulalongana pa Ng’anda ya Bufumu. Nalitemenwe sana ilyo nalesambilila ifyo Baibolo ilanda. Ilyo patile umwaka umo ne myeshi iinono, nalibatishiwe naba ne Nte ya kwa Yehova. Pali ino nshita ndi ne myaka 79 kabili naliba ne nsansa pantu nalisanga ukupepa kwa cine. Yehova alimpaala pa kunenga naba mu lupwa ulwa babomfi bakwe abaipeela.”