“Lang pitah bani jolma na montas Saksi Jahowa bujur, tapi sonai do homa bani baliangku. Bani sada panorang, si Elaine, na jongjong i lambung ni rak beroda mambere ‘biskuit’ bani haduasi baliangku. Dobkonsi ai, tiap mamontas hanami hunjai, mintor hujai ma uhur ni baliangkon ase dapotan biskuit sidea.

“Sadokah marbulan-bulan, baliangku marosuh bani biskuit na ibere si Elaine. Tapi anggo ahu marosuh do marbuali pakon Saksi Jahowa, tapi tongkin-tongkin dassa. Marumur ma ahu 70 tahun lobih sanggah ai. Tapi lang pos dope uhurhu bani Saksi Jahowa halani ahu kecewa bani gareja Protestan. Nini uhurhu dearan ma ahu marlajar Bibel sandiri.

“Sadokah ai dong do homa huidah Saksi Jahowa na legan i kota on, na jongjong i lambung ni rak beroda. Basar do homa sidea. Sanggah mambalosi sungkun-sungkunku, sai ibalosi sidea do ai marhitei Bibel. On mambahen lambin pos uhurhu bani sidea.

“Bani sada ari isungkun si Elaine ma ahu, ‘Porsaya do ham anggo binatang sibere-bere ni Naibata?’ Hubalosi ma, ‘Porsaya ma ge!’ Dob ai, ibasahon si Elaine ma bangku Jesaya 11:6-9. Humbani ari ai, marosuh ma ahu marlajar Bibel. Tapi lang ra ahu manjalo sibasaon humbani Saksi.

“Piga-piga ari dobkonsi ai, marbuali ma ahu pakon si Elaine ampa si Brent, suamini. Iojur sidea ma ase hubasa buku Mateus ronsi buku Lahoan ni Apostel, ase huarusi aha do artini gabe halak Kristen. Huhorjahon ma ai. Lang piga dokah, marlajar Bibel ma ahu pakon si Brent ampa si Elaine. Bani partongahan tahun 2016 ma ai.

“Sai hupaima-ima do marlajar Bibel pakon martumpu hu Balei Harajaon. Malas tumang do uhurhu anjaha huahapkon do pasu-pasu halani mambotoh aha do sasintongni na niajarhon ni Bibel. Lang piga dokah dobkonsi ai, tardidi ma ahu. Sonari 79 tahun ma umurhu. Malas tumang uhurhu halani domma jumpah ahu ugama na sintong. Huahapkon do homa pasu-pasu ni Jahowa halani domma iurupi ahu gabe anggota kaluarga-Ni i sab dunia on.”