“Mámarügü hama gürigia gamadoun hamá Gefentiña luagu Heowá, gamadoutiña giñe hama nilügüniña ounli. Aban weyu ñeinñoun meha aban würi to gíriboun Elaine, turugabu tarufudaagüle agumeiraguagüdüni aba tíchugun bisigidi o gayeta houn bián nilügüniña ounli. Lárigiñe lira, súnwandan dan le násügürün ñéingiñe, ‘aba hóufudahan ounli ha lun hachülürün hamoun Gefentiña lun hibihin heigan bisigidi o gayeta’.

“Aba lásügürün fiu hati. Ma meha hagundan ounli ha tau heigan bisigidi, ani au, gúndaatina lau nayanuhan hama Gefentiña luagu murusun oura. Lau sun lira mabusenruntina meha nayanuhan hama saragu. Ǘrüwa wein diisi irumu nau ani ibidiñegili meha le úagubei hafiñera Gefentiña luagu Heowá nun. Kei mafiñen haadina lubéi tuagu ligilisi ewanhéliu, aba nasaminarun buídutimabei lan naliihanu Bíbülia nábuguarügü.

“Lidan dan ligía arihatina meha saragu Gefentiña luagu Heowá tau tarufudaagüle agumeiraguagüdüni lidan ámuñegueinarügü fulasu uburugu. Gamadoutiña meha giñe. Súnwandan hóunabuni tau Bíbülia álügüdahani le burí nadügübei, ñein nagumesera afiñera hawagu.

“Aban weyu, aba tálügüdünina Elaine ‘Afiñetün san aban lan idewesei lúmagiñeti Bungiu animaalugu?’. ‘Anha, liña nóunabunu’. Aban taliihani Isaíasi 11:6-9 nun. Lúmagiñe weyu ligía aba lasansirun katei, íbini ítara manügüntina ni aban agumeiraguagüdüni.

“Lidan burí weyu le ásügürübei ayanuhatina dandu tuma Elaine kei luma tani weiriei, le gíribei Brent luagu murusun oura luagu katei súdiniti. Aba hariñagun nun lun naliihan lúmagiñe Matéu darí Adügaü lun gunfuranda nani ka lan mini lubéi layeihóun Kristu. Ani ligía nadügübei. Murusun dan lárigiñe, aba nagumeserun aturiahoun Bíbülia úara luma Brent tuma Elaine. Susereti lira lamidangua irumu 2016.

“Memeniha meha nanigi lun neresibirun dandu aturiahani tídangiñeti Bíbülia sagü dimaasu kei lun nidin adamuridagua tidan Luban Adamuridaguni. Sanditina aban lan abiniruni ani gúndaatina lau le nafurendeirubei tídangiñe Bíbülia. Aban irumu lárigiñe, aba nabadiseirun. Guentó 79 irumu nau, ani gúndaatina lau darí naaru lan relihión inarünitu. Biní laadina Heowá lau líchuguni chansi nun lun hádangiñe nan íbirigu ha ítarabaña kei iduheñu ha eseriwidubaña lun Heowá lidan sun ubóu”.