“Bueno el maga Testigo, gendeh lang con el maga gente sino maskin con el de mio maga perro. Un dia, si Elaine, quien parao na costao del cart, ya dale cuanto biscuit con el de mio dos perro. Despues de ese, cada vez kame pasa alla, quierre-quierre ya anda el maga perro con el maga Testigo para puede come biscuit.

“Ya pasa el cuanto meses. Ya gusta gayot el maga perro con el diila biscuit y alegre yo man cuento con el maga Testigo. Pero, no quierre yo dura man cuento kanila. Mas de 70 ya el de mio edad y gendeh yo asigurao si cosa ta creé el maga Testigo. Cay gendeh yo ta gusta con el maga Protestante religion, ya pensa yo que mas bueno si iyo ya lang solo estudia con el Biblia.

“Durante na ese tiempo, ya mira yo maga Testigo na diferente lugar del ciudad, ta para na costao del diila maga cart. Friendly tambien sila. Pirmi sila ta contesta con el de mio maga pregunta base na Biblia y como resulta, hinay-hinay yo ya confia kanila.

“Un dia, ya pregunta si Elaine, ‘Ta creé ba tu que regalo estaba con Dios el maga animal?’ Ya contesta yo, ‘Si, ta creé gayot yo!’ Despues, ya le conmigo si Elaine el Isaias 11:6-9. Principia aquel tiempo, quierre ya yo aprende acerca na Biblia pero tan alang-alang siempre yo acepta con el diila literatura.

“Pagka-sunod maga dia, ya tiene kame maga corto pero bonito discusion junto con Elaine y el de suyu marido, si Brent. Ya habla sila conmigo que le yo con el Mateo hasta na Maga Actividad para entende yo cosa quierre decir que imita con el Cristo. Poreso, ya hace yo se. Nuay dura despues, ya acepta yo un Bible study junto con Brent y Elaine. Ya sucede se amediao del año 2016.

“Excited gayot yo na de mio Bible study cada semana y na maga miting na Kingdom Hall. Bien alegre gayot yo cay ya puede yo sabe si cosa deverasan ta habla el Biblia. Despues del maga un año, ya queda yo un bautizao Testigo de Jehova. Ahora na edad de 79, sabe yo que na justo camino yo. Ya bendici conmigo si Jehova y ya permiti conmigo que queda parte del de suyu familia na entero mundo.”