“Abo Bahamya tibarakwasire ge abantu kusha, ahobwe bakakwata ge n’embwa zange. Izoba rimwe, Elaine, owabire ari aha kagari k’ebitabo akaha embwa zange bisuguti. Bwanyima ku twabire nituhika hihi n’akagari, embwa zikaba nizinkurura ziri kwenda ngu tubahike bazihe bisuguti.’

“Hakahwaho amezi mingi. Embwa zikakunda ebyo bisuguti nanye nakunda ebiganiro bigufu ebi nabire ningira na bo. Konka nkaba ntari kwenda kugamba na bo byingi. Nkaba nyine emyaka erengire omuri 70 konka ntari kumanya ebi Abahamya bari kwikiriza. Nkaba nayangire amadini g’Abaporoso catuma natekateka kweyegesa Bibuli nyenka.

“Omuri obwo bwire, nkareba abandi Bahamya bari omu gundi mwanya g’omu tawuni bemerire aha rubaju rw’akagari k’ebitabo. Na bo bakaba nibakwata ge abantu. Bakaba nibagarukamu ebibuzo bakoresize Bibuli kandi eco kikatuma nakizaho kubesiga.

“Izoba rimwe, Elaine akambuza ngu: ‘Mbehi noyikiriza ku enyamishwa ari ekiconco eki Ruhanga yatuhire?’ Nkamugarukamu ngu, ‘yego ninkikiriza!’ Bwanyima Elaine akanshomera ebiri omuri Isaaaya 11:​6-9. Kuruga obwo nkahurira nagira ekihika c’okwega ebiri kukiraho, konka tinayikiriza ekitabo.

“Omu mazoba agakurasireho, nkakunda ebiganiro bigufu ebi nabire ningira na Elaine n’omushija weye Brent. Bakanshaba kushoma ebiri omuri Matayo kuhisya omu Byakozirwe ngu nshoborocerwe ebiri kushabwa Abakristo. Kandi eco ni co eki nakozire. Bwanyima y’obwire buce, nkikiriza kwega Bibuli na Brent na Elaine. Hakaba hari ahagati y’omwaka gwa 2016.

“Nkaba ninkunda kwega Bibuli buri sande kandi nza n’omu nterane. Nkahurira nashemererwa ahabw’okwega ebi Bibuli eri kugamba. Bwanyima y’omwaka gumwe nkabatizibwa. Hati nyine emyaka 79, konka nimanya ku ndi omu dini ey’amazima. Yehova akampa emigisha ari kunyikiriza kuba omwe omu b’omu ka yeye.”