“Jehovah Tehte Hna cu minung cung lawngah si loin ka uico cung zongah dawtnak an ngei. Nikhat cu leng pawngah a dirmi Elaine nih ka uico pahnih kha biscuit changreu tlawmpal a dangh hna. Mah hnu cun cuka pawngin kan kal fatin ka uico pawl nih biscuit ei duh ah Jehovah Tehte Hna pawngah an ka hnuh peng.

“Thla tlawmpal a rauh hnu cun ka uico pawl nih an biscuit kha an duh tuk i kei zong Jehovah Tehte Hna he chikkhat bia i ruah kha ka hun duh ve. Asinain bia tampi i ruah cu ka duh lo. Kei cu kum 70 leng ka si cang i Jehovah Tehte Hna i an zumhnak kong zong ṭha tein ka hngal lo. Church tampi cungah ka lung a dongh caah keimah tein Baibal hlathlai cu a ṭha bikmi a si tiah ka ruah.

“Mah lio caan ah kan khua i kaadang hmun hna zongah Jehovah Tehte Hna cu an cauk chiahnak leng pawngah an dirmi kha ka hmuh. Annih zong an hmai a panh tuk. Ka biahalnak kip kha Baibal in an ka leh peng i mah nih an cungah zumhnak a ka ngeihter chin.

“Nikhat cu Elaine nih ‘Saram pawl hi Pathian pekmi laksawng an si ti na zum maw?’ tiah a ka hal. ‘A si, ka zumh tuk!’ tiah ka leh. Cun Elaine nih Isaiah 11:6-9 kha a ka relpiak. Mah caan thawkin Baibal cawn cu ka duh ko nain an cauk pawl lak kha ka duh rih lo.

“Elaine le a vapa Brent he caan tawite lawng kan i ruahceih nain mah cu sullam a ngei tuk. A hmaanmi Khrihfa sinak ah zeidah aa tel timi hngalh awkah Matthai in Lamkaltu tiang rel dingin ruahnak an ka cheuh. Mah ningin ka rak tuah. Mah hnu tlawmpal ah, Brent le Elaine he Baibal cawn dingin ka cohlan. Mah cu 2016, ṭhal caan ah a si.

“Zarh fatin Baibal cawnnak le Biakinn ah i pumhnak kha kaa ngaih tuk. Baibal cawnpiaknak taktak cawnnak ah kaa nuam tuk i mah kha thluachuah in ka hmuh. Kumkhat leng a rauh hnuah Jehovah Tehte pakhat in tipil ka ing. Atu ah kum 79 ka si cang i a hmaanmi biaknak ka hmuh caah kaa lawm tuk. Jehovah nih vawleicung pumpi a chungkhar lakah a ka telternak thawngin thluachuah a ka pek.”