Gayetata mʉ̃ usaita
NAɄ̃TA bʉsi Nik pʉwʉrʉ Oregónʼnebemata (Estados Unidos). «Poaga 2014de mʉ̃ra mʉ̃ usabawara ode wãsi, mawũã wãbʉde mʉ̃a ewari jõmaʉ̃nẽ ũdubasi Jeowa ʉ̃rʉ Kʼawuabipanʉrãta ãyi esibidor eda panʉta. Ãyira bia yopanasi akʉza dayaʼa ibiade bedʼeapanasi».
«Jeowa ʉ̃rʉ Kʼawuabipanʉrãra bari mʉ̃a ibia bedʼeapana ẽ basi, mʉ̃ usasida ãyara bia edapanasi, ewari aba ãyi esibidordebasi ẽbẽra wẽrã yi trʉ̃ Elaine, maʉ̃ba gayetata diasi mʉ̃ usa ũmepanʉa, maʉ̃ kʼarea mʉ̃ta mʉ̃ usa ũme berabaribʉrʉza usarãra mama wãkĩrãpanasi ãya gayetata diadamarẽã».
«Mawũẽra mʉ̃ usarãra mejãchade sobiapanasi ãya gayetata diapanʉta akʉza mʉ̃sida sobiabasi Jeowa ʉ̃rʉ Kʼawuabipanʉrãbawara bedʼeabʉ baera. Mawũãbʉta jedeko bio berabarisi. Mʉ̃ra 70 poaga audre basi akʉza akʉbasi ʉ̃kʉrʉ religionba kʼãrẽta sãwũã ozebʉrʉta akʉza mʉ̃a kãga ẽ basi ãya obʉra. Mʉ̃a biʼia kʼawua ẽ basi sãwũãbʉta Jeowa ʉ̃rʉ Kʼawuabipanʉrã religionʼra, maʉ̃ kʼarea mʉ̃a bari ũrĩbasi, wãrĩnu ĩjãita krĩcha ẽ basi, mʉ̃a krĩchabasi audre yibiabaita mʉ̃yi dobaʉba Daizeze Bedʼea kʼawuaita».
«Mʉ̃a ode wãbʉrʉza mʉ̃a ũdubasi awuru Jeowa ʉ̃rʉ Kʼawuabipanʉrãta ãyi esibidordebʉta. Ãyira ewari jõmaʉ̃nẽ mʉ̃a ibiade bedʼeapanasi, maʉ̃ awuara mʉ̃a widibʉra ewari jõmaʉ̃nẽ ãyara panʉpanasi Daizeze Bedʼeadeba, maʉ̃ kʼarea mʉ̃a audre ĩjã wãsi ãya jaradiapanʉra».
«Ewari aba Elaineʼba mʉ̃aa widisi:‹¿Bʉmara nedʉwʉrʉrãra Daizezeba nebia diadaka?›, aramaʉ̃ta mʉ̃a jarasi: ‹Mawũã›, aramaʉ̃ta Elaineʼba mʉ̃aa le ũrĩbisi Isaías 11:6-9 bayeda, maʉ̃neba ʉ̃ta mʉ̃ra awuara krĩchasi, mʉ̃a wabida ede ẽ basimina kartara mʉ̃ deda, mʉ̃a audre kʼawuakĩrãbasi Daizeze ʉ̃rʉ».
«Maʉ̃ tẽã akʉza Elaine adewara yi kima Brentʼʉ̃me bedʼeasidera, ãyara audre bia jaradiasida Daizeze Bedʼea ʉ̃rʉ, maʉ̃ne ãya mʉ̃a ũrãgʼa biata diasida. Jarasida mʉ̃a lemarẽã Mateodeba Hechoseda kʼawuaita sãwũã Jesude kĩrãkʼa oita, mawũẽra mʉ̃ara ãya jarada kĩrãkʼa osi. Maʉ̃ tẽã mʉ̃a ãyaʼa jarasi mʉ̃a Daizeze Bedʼeata semanaza jaradia zedamarẽã. Naʉ̃ta berabarisi poaga 2016de».
«Mʉ̃ara sobiade jʉ̃ãbasi semanaza mʉ̃aa Daizeze Bedʼeata jaradia zemarẽã, adewara jipade wãkĩrãbasi ãba yi jʉrebarima. Mʉ̃ra sobiabasi mʉ̃a kʼawuabʉ baera kʼãrẽta jaradiabʉta Daizeze Bedʼeaba, Mawũãbʉta poaga aba berabaribʉrʉde mʉ̃ra buru kʼoesi. Atiara mʉ̃ra 79 poagabʉ, adewara kʼawuabʉ mʉ̃ra religion wãrĩnuararebʉta akʉza sobiabʉ Jeowaba iduaribisi baera mʉ̃ta iyi pʉwʉrʉeda bamarẽã, naʉ̃ra mʉ̃ mebẽrãra naʉ̃ drʉa jõmaʉ̃nẽbʉ kĩrãkʼabʉ, adewara Jeowaba mʉ̃aa nebia diada kĩrãkʼabʉ».
