“Yi mboṅ a Yehova i ta i lee̱le̱ bato be̱se̱ muyao, nate̱na mo̱me̱ne̱ mbo̱ am. Buńa bō̱, Elaine, a ta a te̱me̱ be̱be̱ n’ebamban, na mo̱ a bola bana bam ba mbo̱ baba bewolo. Ombusa nika, ponda te̱ di tano̱ di tomba be̱be̱ n’ebamban, mbo̱ i ta nde i pula sisea mboṅ a Yehova be̱be̱ ná i kuse bewolo.

“Nika e kumo o wala oboso myo̱di jita. Mbo̱ i ta i bwane̱ bewolo babu muńe̱nge̱, mba pe̱ na bwane̱ son ekwal’a bwam na mboṅ a Yehova muńe̱nge̱. Nde na si ta na pula kwala na babo̱ pond’a bwaba. Na ta na mábuka 70 mbu, na si ta pe̱ to̱ na bia nje ba dube̱no̱. Nika na si so̱ino̱ mbale̱ na tano̱ na wasa o ebas’a Protestant, na ta na domse̱ ná ye bwam nokwa Bibe̱l na mbame̱ne̱.

“O ni pambo a ponda, na ta ne̱ne̱ mboṅ a Yehova ipe̱pe̱ o ńai na ńai a bepolo ba mundi, i te̱m be̱be̱ n’ebamban abu. Babo̱ pe̱ ba ta muyao jita. Ba ta ba bolane̱ Bibe̱l ponda ye̱se̱ o jalabe̱ myuedi mam, nik’e boli ná na bate lakisane̱ babo̱.

“Buńa bō̱, na Elaine a baise̱ mba ná, ‘Mo̱ o bi ná ńama ye nde jabea la Loba e?’ Na mba nalabe̱ ná, ‘E, na bi nika!’ Na Elaine a langea mba Yesaya 11:6-9. Botea bo buńa nde na botedino̱ be̱ne̱ ńo̱ng’a jokwa Bibe̱l, nde na si ta te̱ nde na pula no̱ngo̱ kalat’a mboṅ a Yehova.

“O mińa mi bupe̱, na botedi to̱ndo̱ ekwal’a bwam na tano̱ na kwala na Elaine na mom’ao Brent. Na babo̱ ba langwea mba ná na lange kalat’a Mateo nate̱na Bebolo ná na so̱ṅtane̱ nje be̱ la kriste̱n a mbale̱ di mapulano̱ kwala. Na langi mo̱. Ombusa nika nde nemedino̱ jokwa Bibe̱l na Brent na Elaine. Nik’e ta nde o mongo maba ma mbu 2016.

“Na ta nokwa Bibe̱l woki te̱, nukea pe̱ o ndongame̱n o Ndabo a Janea. Na ta muńe̱nge̱ jita o jokwa nje Bibe̱l e makwalano̱. Lambo ka mbu mō̱ ombusa ponda nde na dubisabe̱no̱. Tatan na mábe̱ne̱ 79 mbu, na bi ná ne nde o ngea ni te̱nge̱n. Yehova a namse̱ mba ná ongwane̱ mba o be̱ o mbia ma baboledi bao ma wase ńe̱se̱.”