« Sé Témwen-la pa té janti enki èvè sé moun-la yo té ka jwenn la men yo té janti èvè 2 ti chyen an mwen osi. On jou, Elaine ki té doubout owa prézantwa-la ba-yo déotwa ti bisui. Dépi jou-lasa, chakfwa nou té ka rivé owa prézantwa-la, sé chyen-la té ka ralé asi kòd a yo pou yo té pé sa ay chèché bisui a yo.

« Sa kontinyé konsa pannan plizyè mwa é a pa ti kontan sé chyen-la té kontan bisui a yo ! Kanta mwen, an té kontan sé ti kozé-la an té ka fè la èvè sé Témwen-la. Men an pa té vé rantré two fon adan yo. An té ni plis ki 70 lanné é an pa té sav adan ki biten yo té ka kwè vréman. Anplisdisa, konm onlo rèlijyon té ja désèvwa-mwen, an té préféré étidyé Labib tousèl an mwen.

« Pannan péryòd-lasa, an jwenn dòt Témwen plizyè koté adan vil-la. Yo té ka préché èvè prézantwa-la osi. Yo toujou té byen janti èvè lézòt. É piti-a-piti an koumansé fè-yo konfyans pas yo toujou té ka réponn a kèsyon an mwen èvè Labib.

« On jou, mi sa Elaine mandé-mwen : “Ès ou ka pansé kè zannimo sé on kado Bondyé fè-nou ?” An réponn-li : “A wi, an sèten dè sa !” Aprésa, Elaine li Izayi 11:6-9 pou mwen. Lèwvwè an tann sa, sa ban-mwen anvi konnèt plis biten asi Labib men an té on ti jan pè aksèpté piblikasyon a yo toujou.

« Pannan sé jou-la ki vin apré la, an palé plizyè fwa èvè Elaine é mari a-y, Brent. Sa pa té ka diré lontan men sa té entérésan toubònman. Yo di-mwen kè si an li liv a Matyé pou rivé adan liv Akt, sa ké édé-mwen konprann plibyen ka ki on vré krétyen. Alò, sé sa an fè. Tibwen tan apré, an koumansé étidyé Labib èvè Brent é Elaine. Sé té an 2016, anmitan a lanné-la apépré.

« A pa ti kontan an té kontan étidyé Labib é vin réinyon adan sal di Wayòm la ! Grasa sa, an té ka konprann ka Labib ka anségné vréman é sa té ka mèt onlo jwa an tchè an mwen. Apré 1 an é kèlkè mwa, an pran lèbatèm é an vin Témwen a Jéova. Jòdila, an ni 79 an asi tèt an mwen é an sav kè an asi bon chimen-la. Jéova béni-mwen toubònman pas i akéyi-mwen bra gran wouvè adan fanmi a-y. »