“Abola Bahamirizi baliri bayerekana obwinja, arhali oku bantu bonyine, si n’oku mbwa zani. Lusiku luguma, Elaine, waliyumangire hofu n’eprezantware, ahereza embwa zani zombi ebisikwi. Enyuma w’ahola, eyi nakashubire gera ahola nazo, zaliri zashuma-shumira ebitabu bili oku prezantware zalonza mpu bazihe ebindi biskwi.’

“Hagera emyezi kurhenga amango embwa zani zasiimiraga ebiskwi, olola lisiku nani nalijirire enganiro ngeke haguma n’abola Bahamirizi. Aliko ntalonzaga kuganira nabo binene. Naligwerhe myaka erhalukire 70, eyi ntanasaga menya obuyemere bw’Abahamirizi. Bulala amakanisa m’Abaporo mabaga manvunire murhima, nabona oku kuli kwinja nyenine nchiyigirize Ebiblia.

“Mw’amola mango moshi, naliri nabona Abahamirizi fasi zinene omu vile bayumangire eburhambi bw’amaprezantware. Nabo baliri bantu benja. Baliri bampa ebishubizo birhengere omu Biblia oku bibazo byani boshi, n’echola charhuma nachizerabo bwenene.

“Lusiku luguma, Elaine ambaza, ‘K’oyemerere okw’enyama luli luhembo lurhengere emwa Mungu?’ Namushubiza mpu, ‘Nechi, menyere echola bwinja!’ Ansomera olwandiko lwa Isaya 11:6-9. Kurhenga amola mango nasima kumenya binene oku bilolere Ebiblia, aliko nagenderera kulahira ebitabu by’Abahamirizi.

“Esiku zakulikiragaho, najira enganiro nyofi aliko egwerhe ech’emalire haguma na Elaine n’eba, Brent. Bambwira okw’akaba byakahashikana, insome echitabu cha Matayo kugera ku Matendo y’inyunva bwinja bichi na bichi omuntu akajira y’aba Mukristu w’okuli. Nanajira ntyo. Harhalegamaga, nayemera kuyiga Ebiblia haguma na Brent bombi mukage Elaine. Haliri ahagarhi k’omwaka gwa 2016.

“Naliri nalinga oku nyorha olusiku lwani l’okuyiga Ebiblia n’okuja oku mbuganano oku Chumbi ly’Obwami. Nalibwene oku guli mugisho na mwishingo gunene okuyiga bichi Ebiblia ederhe kanuni. Enyuma y’omwaka, nabatizwa n’okuba Muhamirizi wa Yehova. Zene nkala ngwerhe myaka 79, menyere oku indi omu njira y’okuli. Yehova angishire omu kumpeba omu mulala gw’abakozi bage.”