“Ovahongonone va Jehova aave raisa ouwa kovandu, nu wina va raisa ouwa kozombwa zandje. Eyuva rimwe Elaine ngwa kuramene pokatemba komambo, wa yandja oumbeskiti kozombwa zandje mbari. Korusenina, otjikando atjihe tji matu ya popezu nokatemba komambo, ozombwa aaze vanga okuyenda kOvahongonone va Jehova okukapewa oumbeskiti.

“Oruveze otja tjaaru kayenda, ozombwa zandje aaze tjaterwa okukarya oumbeskiti, nu ami ee tjaterwa okuserekarera pu nOvahongonone va Jehova. Posi yokutja hee vanga okurihitisa tjinene mu wo. Ami mba ri notjiwondo tjozombura zokombanda 70, nu hee tjiwa kutja Ovahongonone va Jehova ve kambura mu ye. Mena rokutja hee tjaterwa i yovitjitwa vyozokereka ozengi, ami mba muna kutja onawa okurihonga Ombeibela ku ami omuini.

“Moruveze ndwo, ami mba muna Ovahongonone va Jehova mba kuramene poutemba wawo womambo potuveze twarwe motjihuro. Owo wina aruhe aave raisa ongaro ombwa. Owo aruhe aave ziri omapuriro wandje okuza mOmbeibela, nu iho tja tjita kutja mbi ute okukara nongamburiro mu wo.

“Eyuva rimwe Elaine we ndji pura kutja, ‘U nongamburiro kutja ovipuka oviyandjewa okuza ku Mukuru?’ Ami mba zira ne tja: ‘Ii mbi kambura.’ Okuzambo Elaine we ndji lesera Jesaja 11:6-9. Nu okuza kotjikando ho, ami ee vanga okurihonga ovingi ohunga nOmbeibela, posi yokutja ngunda hee vanga okukambura omambo okuza kOvahongonone va Jehova.

“Momayuva nga kongorera ko, ami mba kara nondjoroka okuserekarera omahungi omawa omatunge ku na Elaine nomurumendu we Brent. Owo ve ndji pa ondunge yokulesa Mateus nga kembo rOviungura, kokutja mbi zuve nawa kutja okurira Omukriste watjiri ku heya tjike? Nu ami mba tjita nao. Oruveze orusupi kombunda yanao, ami mba yakura okurihonga Ombeibela pu na Brent na Elaine. Iho tja ri mokati kombura ndji 2016.

“Ami ee zeri omerihongero wandje wOmbeibela otjivike atjihe, nokukara pozombongarero zombongo pEtuwo rOmerikotameneno. Ami ee munu kutja tjiri mba serwa ondaya nu mba ri nondjoroka okurihonga ouatjiri wOmbeibela. Ousupi kombunda yombura imwe, ami mba papitisiwa otjOmuhongonone wa Jehova. Ami nai mbi nozombura 79, nu mbi nondangi tjinene kutja mba muna ongamburiro youatjiri. Jehova we ndji sera ondaya mokundjivatera kutja mbi rire orupa rweṱunḓu re rovakambure mouye auhe.”