“Bala Saksi ukai semina manah ngagai orang aja, tang sida mega manah enggau ukui aku. Bisi sekali, Elaine ke bediri ngimbai troli litaricha meri roti ngagai dua iku ukui aku. Pengudah nya, tiap kali kami datai semak ngagai troli litaricha, dua iku ukui aku seruran deka datai semak ngagai bala Saksi laban deka minta roti sida.

“Beberapa bulan udah belalu. Dua iku ukui aku amat gaga ati ulih makai roti sida, lalu aku gaga ati ulih berandau mimit enggau bala Saksi. Tang aku agi kakang ati. Nyadi aku enggai kelalu rapat enggau sida. Aku beumur lebih ari 70 taun. Aku mega enda entu nemu utai ke dipechayaka bala Saksi. Aku asa ati enggau mayuh gerija. Nya alai, aku ngumbai manah agi enti aku belajarka Bup Kudus kediri empu.

“Ba maya ti sama, aku meda bala Saksi ke bukai ba endur ke bukai di bandar tu. Sida mega bediri ngimbai troli litaricha. Sida mega seruran manah ngagai orang. Lalu sida seruran nyaut tanya aku ari Bup Kudus. Nya ngasuh aku majak pechayaka sida.

“Bisi sekali, Elaine nanya aku, ‘Kati nuan pechaya bala jelu tu pemeri ari Petara?’ Aku nyaut, ‘Au, aku pechaya!’ Elaine lalu bekunsika Isaiah 11:6-9 ngagai aku. Ketegal nya, aku deka belajarka Bup Kudus. Taja pia, maya nya aku agi bedau deka nerima litaricha ari bala Saksi.

“Beberapa hari udah nya, aku terus berandau enggau Elaine sereta laki iya, Brent. Taja pan randau kami nya semina mimit aja, tang aku gaga ati enggau nya. Sida meransang aku macha bup Matthew nyentuk ngagai Surat Kereja Rasul ngambika ulih mereti agi chara nyadi orang Kristian ti bendar. Aku pan nitihka utai ku sida. Enda lama pengudah nya, iya nya ba tengan taun 2016, aku nerima deka belajarka Bup Kudus enggau Brent sereta Elaine.

“Ninting minggu aku enda sabar deka belajarka Bup Kudus sereta datai ngagai gempuru. Aku amat gaga ati laban ulih belajarka pemendar ari Bup Kudus. Lebih setaun pengudah nya, aku dibaptisa lalu nyadi seiku ari Saksi Jehovah. Diatu aku beumur 79 taun, aku nemu aku nitihka jalai pengarap ti bendar. Jehovah udah merekatka aku lalu mai aku nyadi sebagi ari ruang bilik penyembah Iya di serata dunya.”