Biscuit Para ta Dua nga Kitù
“NAMEGAFU turi ta spring na 2014, nipasa-pasiar ku i dua nga baddi nga kitù ta sentro na siudad mi,” nitura ni Nick nga maddian ta Oregon, U.S.A. “Kanayun nga masingakku i Saksi ira tatun nga mac-cart. Makasta i assissinnudda anna ngizzitadda i ngamin nga mattalebag.
“Ari laman tu masippo i Saksi ira ta totolay, maski gapa ta kitù ira nga terrier i lahi da. Mittan, mac-cart si Elaine, tapus niddan na tu biscuit i dua nga kitù. Yari tu kada mattalebag kami ngana na kitù ira ta cart, gugguggunaddà tapenu iyangè ira ta Saksi ira nga mangiyawa tu biscuit.
“Nappasa i piga nga vulan, ma-e-enjoy lagapa na kitù ira i biscuit da anna ma-enjoy ku gapa i ababba nga pakibbidà ta Saksi ira. Ngem magalangan ngà nga maki-close ta nira. Maturu tu 70 ngana gare i dagukku anna ari ku ammu nu anni i kuru-kurugan na Saksi ira. Dismayadu ngà ta aru nga relihion nga makkakkagi tu Cristiano ira, yari tu nanono ku nga mas makasta nu gigiammuakku na lapa i Biblia.
“Tatun nga tiempo, nammammù gapa i tanakuan paga ira nga Saksi nga mac-cart ta madduruma nga parte na siudad. Friendly gapa ira. Kanayudda nga tabbagan i pakkiavu ku ira gukaban na Biblia yari tu mas nattalo ngà ta nira.
“Tadday nga aggaw, niyavu ni Elaine, ‘Kurugammu kari nga regalu na Dios i ayam ira?’ Kukku nisa, ‘Siempre gapa!’ Nibibbig ni Elaine ta niakan i Isaias 11:6-9. Namegafu tatun, nagganas ngà uli nga maggigiammu tu Biblia. Ngem manaki ku lagapa nga mangalawa tu literatura ira na Saksi.
“Ta tumunug ira nga aggaw, kanayukku ngana nga kistorian tu manganannuan da Elaine anna i atawa na nga si Brent. Ma-enjoy ku yatun megafu ta pabbidammi i meyannung ta makapa-interes ira nga gannug. Kinagi da nga puruebakku kanu nga bibbigan i Mateo adde ta Kingngua tapenu malippawa ku nu anni i kebalinan na pabbalin tu kurug nga Cristiano. Kingnguà yatun. Ari nabbayag, turi ta summer na 2016, nappa-Bible study ngà kada Brent anni Elaine.
“Excited ngà ta Bible study mi kada ligguan anna ta pagatendè ta study ta Kingdom Hall. Kuruga magayayya ngà ta magiggigiammù i kurug nga ituttuddu na Biblia. Yari tu pappasa na maturu tu tanga-ragun, nappa-baptize ngà ngana. Sangawe, 79 ngana i dagukku. Mappappabalo ngà ta nalegakku i kurug nga relihion. Binendisionan nà ni Jehova gukaban na panguffun na niakan tapenu mabbalin tu parte na familia na ta interu mundo.”
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
