“Orọnikọ ahwo ọvo Isẹri Jihova a jẹ whẹtiẹ họ oma ha, a jẹ riẹ erakọ mẹ ru ziezi re. Ẹdẹ jọ, Osẹri Jihova nọ a re se Elaine nọ o dikihẹ kẹle oware nọ a re fi emagazini rai họ na ọ tẹ kẹ erakọ ivẹ mẹ ibiskiti. No umuo ẹdẹ yena vrẹ, ẹdẹ kpobi nọ ma be nya etẹe vrẹ, erakọ mẹ na a rẹ gwọlọ wẹriẹ, avọ ufi nọ me thuru họ ae uriohọ nọ a bi si keme a gwọlọ nyae re imibiskiti jọ.

“Ere-ere ọvo o jọ evaọ emerae jọ. Ẹdẹ kpobi nọ ma nya etẹe vrẹ, erakọ mẹ e rẹ re ibiskiti, Isẹri Jihova a vẹ jẹ ta usi uwoma kẹ omẹ. Rekọ mẹ jẹ gwọlọ fi ezọ họ ẹme rai tere he. Evaọ oke yena, mẹ kpako vrẹ ikpe udhosa-gbikpe no, yọ mẹ nwane riẹ oware nọ Isẹri Jihova a bi wuhrẹ evaọ egagọ rai hi. Me kpohọ ichọche Protẹstant sa-sa no yọ mẹ ruẹ nọ oware ovo o rrọ obei hi. Fikiere mẹ tẹ ta nọ mẹ rẹ tubẹ jọ uwou mẹ wuhrẹ Ebaibol kẹ omobọ mẹ.

“Evaọ oke yena ovona, mẹ jẹ hae ruẹ Isẹri Jihova efa evaọ eria sa-sa ẹwho na nọ a dikihẹ kẹle oware nọ a re ghelie nọ a re fi emagazini rai họ na. Ae omarai a re yere ohwo kpobi sasasa re. Onọ kpobi nọ mẹ nọ rai, a rẹ rọ Ebaibol kẹ uyo riẹ. Onana u ru nọ me ro mu ezọ họ ẹgaviẹ kẹ ae ziezi.

“Ẹdẹ jọ Elaine ọ tẹ nọ omẹ nọ, ‘Kọ whọ riẹ nọ erao yọ okẹ nọ Ọghẹnẹ ọ kẹ omai?’ Mẹ tẹ ta kẹe họ, ‘Ẹhẹ, mẹ riẹ ere dẹẹ!’ Kẹsena Elaine o te se obe Aizaya 11:6-9 kẹ omẹ. Oware nọ o se na o te omẹ udu gaga dede nọ evaọ oke yena mẹ re rọwo mi ai emagazini rai ọvo ho.

“Nọ ẹdẹ yena ọ vrẹ no, Elaine avọ Brent ọzae riẹ a tẹ jẹ hae ta usi uwoma kẹ omẹ ẹsikpobi. Yọ usi uwoma na o jẹ hae were omẹ oma. A tẹ ta kẹ omẹ nọ u ti woma re me se obe Matiu rite Iruẹru Ikọ re mẹ riẹ oghẹrẹ uzuazọ nọ u fo nọ Oleleikristi o re yeri. Me te gine se ebe Ebaibol yena. Nọ me se ai no, u gbe kri hi, mẹ tẹ rọwo nọ Brent avọ Elaine a wuhrẹ Ebaibol kugbe omẹ. Oware nana o via evaọ ubrobọ udevie ukpe 2016.

“Uwuhrẹ Ebaibol koka koka nọ a je ru kugbe omẹ gbe iwuhrẹ nọ mẹ jẹ hae nya evaọ obọ Ọgwa Uvie e jẹ hae were omẹ oma gaga. Mẹ jẹ hae ta nọ jọ ẹdẹ na o te vẹrẹ. Eva e be were omẹ gaga nọ me bi wuhrẹ Ebaibol na, mẹ tẹ jẹ riẹ uzẹme na no enẹna. Nọ ukpe ọvo o vrẹ no, u gbe lehie he, mẹ tẹ họ-ame evaọ ukoko Isẹri Jihova. Obọnana mẹ kpako te ikpe udhosa gbe ikpegbizii no yọ mẹ riẹ nọ edhere uzuazọ na mẹ rrọ na. Jihova ọ riẹ omẹ ru gaga nọ o ro si omẹ ziọ uviuwou akpọ-soso riẹ.”