“Batemw baakady baleej bulengel bwaabab kiin teng kudy baat ki cikwaabw kudy tuutubw twaam. Diifuk dikwaabw, Elaine, waakady wiman ku kadiitempw, waakishil tuutubw twaam tubidy biskwiit. Kuunyim, hatwaakady bafweej habwiih ni kadiitempw, tuutubw tukacil bwa kuy kudy Batemw bwa kuhet ‘tubiskwiit’ twaababw.

“Hahicilok suuny yivul, tuutubw twaakady tukat biskwiit byaabab, ni naakady mukat mwiisamb ni Batemw waakady ulongek mu minit yikeeh. Ki naakady nelakan bwa kwiisamb naabw bikasakan. Naakady ni mivw yihit ha 70, ni cyaakady mutwiishibw bwa malongweesh mady Batemw biitab. Bu munaakady mumb mwanz ku makas bwa bitendeleel bya bukw-a-bwiin Krist bivul, Nalangil neey: byaakady bilengel menmen bwa mim kwiilongel Bibl.

“Ha ciisang aacy, natadil Batemw bakwaabw mu karcyeeh yikwabw ya mu cimeng aamw, biman ku butamb bwa tumatempw twaababw twa mikand. Bakaady byaab ni musangeel. Baakady teng baalabul majooj maam ku dyambulwiish dya Bibl ni kulong kwaabab kwa nook, kulongel bwa ni bateekel micim bikasakan.

“Diifuk dikwaabw, Elaine uuyihangujil neey: ‘Wiitaatabok neey: nyam i cya bukish cya kudy Mawej eeny?’ Namwaalabwiil neey: ‘Ying, niitaatab naak!’ Elaine ubadil naany Yeshaay 11:6-9. Nacyaakady teng nelakan bwa kubal myand ya Batemw ni bwa kwiiyiitab.

“Mu mafuk malondel, nakacil miisambw ya mu minit yikeeh ni ya buseeb buvul yitwaakady tulong ni Elaine ni mbaayend, Brent. Baaleejel neey: naakady mubalok mukand a Matewus teng ni ku Myand yilongel bapostol bwa kumvw cidy kwiikal mwiin Krist a biin-biin. Ki i cicy cinalongel. Hahicil mafuk makeeh, niitabil bwa kulong Bibl ni Brent ni Elaine. Twaakady mukacy mwa muvw a 2016.

“Naakady nalong Bibl luming loos ni naakady nay ku Nzubw a Bukaleng bwa kutweel mu bisangil. Numvwiil musangal muvul bwa kulong cileeleeb Bibl menmen. Mafuk makeeh kuunyim kwa muvw muman kuhit, nahetel baatiisumw ni nashaadil Temw. Kaabaak nady ni bidimw 79, nady ni dyanyish divul ni nady mumanyik neey: nady muhet citendeleel cya biin-biin. Yehow i mufiil kis hakuyiitabil bwa kwiikal umw wa mu biin cisak cindiy cya bulab butuutul bady bilambul kudyey.”