“Abema mubathasubulira okw’ikangania abandu b’olhukeri aliwe kandi mubalhukangania n’esyombwa syaghe. Kiro kighuma, Elaine, oyuwabya imene okwa kaggali k’ebitabu mwaha esyombwa syaghe ibiri sy’esyobbiskwiti. Enyuma waho, ithukabya thukahika ahali ehiggali hy’ebitabu, esyombwa isikanza sighende ahali Abema nuku basihe esyobbiskwiti.

“Muhalhaba amezi. Esyombwa isikatsemera esyobbiskwiti syabu, kandi naghe iningatsema thukakanirania n’Abema omwa bikuhi. Isindyanza erikania nabu binene. Nabya w’emyaka eyilhabire oku 70 kandi nabya isingasi ebya Bema ba Yehova bikirirye. Nabya inabiriyiponera busana n’ebikabya omwa syokanisa sy’ekipira, neryo munalhangira ikyuwene eriyisomera e Biblia ahabwaghe.

“Okwa buthuku obo, munalhangira abandi Bema ibanimene okwa higgali hy’ebitabu omwa myanya muthina-muthina y’etawuni. Nabu mughulhu wosi ibakabya ibanatsemire. Ibakabya ibanayitheghekire erisubirya ebibulyo omw’ikolesya e Biblia, kandi busana n’ekyo eriyikethera lyaghe omw’ibo mulyongera.

“Kiro kighuma, Elaine mwanyibulya athi, ‘Wun’ikirirye ngoku ebisoro ni kihembo erilhua oku Nyamuhanga?’ Munasubirya indi, ‘Ee, kwabine bithya!’ Neryo Elaine mwanyisomera Isaya 11:6-9. Mukyahindulha engebe yaghe, nomwakine indi ngabya ingakinasaghire erimya okwa bitabu by’Abema.

“Ebiro ebyakwamako, munatsemera erikanirania omwa bikuhi kandi erikahimba eryo nabya ingathunga na Elaine na mwira wiwe, Brent. Mubambwira bathi ngasome Matayo erihika okwa Mibiiri y’Abakwenda eriyitheghererya ngoku nangagherererya Kristo. Neryo munakolha ekyo. Muhathalhaba buthuku ngathe ngaligha Brent na Elaine eribya bakanyeghesya e Biblia. Ekyo kyabya ahakathi-kathi k’omwaka wa 2016.

“Iningalindirira kutsibu erigha lyaghe ly’obuli wiki n’emihindano y’okwa Kisenge ky’Obwami. Munayowa ini mughisa kandi munatsema eribya inganemw’igha ebye Biblia yikabugha. Habere halhaba mwaka mughuma na, munabatizibwa ng’Omwema wa Yehova. Lino ngawithe myaka 79, nganasi ku ngali omwa nzira y’ekwenene. Yehova abirinyitsumulha omw’inyihira omw’ihiika ly’abaghombe biwe abayihereyo.”