“O cho ko waŋnda le nda wa biyɔɔ nyɛkɛndɛi le. Kɛ ma bii vɛlɛ tuŋaa niaa nyɛkɛndɛi. Paale pilɛ, mɛɛ ya komal Elani isisi o pɛŋgɛi keŋ ikɛi, mbo ke tuŋaa niaa nyɛm diaaŋ. Chɔŋ niŋ a paale leŋ, teleŋ o teleŋ naŋ kuɛ pɛ kelaa o fondaŋ koŋ, mi tuŋaa niaa ndaa naŋ ya le halikpeŋ miŋ kuɛ naa Seiyaa Chɛhowaa wa yooŋgu kɛndɔɔ dimioo wa. Kanifuule, ndaa sina maa te ŋ kuɛ loŋ pɛ, a cho nyɛm diaaŋ sɔla.

“Mi hei yɔŋnuŋ le paŋguŋ bɔɔbɔɔ. Nduyɛ mi ndaa tuei nyɛm diaaŋ ndaa sɔla woŋ yeela. Ya bɛɛ, mi yaa tuei balta naŋ duau laŋ yeela tau. Kɛ yaa yeema mi dɔu baltaŋ a nda tau le. Yaa hiou niŋ wɔsilaŋ 70, nduyɛ yaa sina tau a laalaŋnda Seiyaa Chɛhowaa okɔɔ le. A teleŋ koŋ, yaa tambu niŋ kɔllo a kaŋii bɔɔbɔɔ yaa kuɛ niŋnde. Le hei, mi kɛɛsiaa le Baabuiyo pɛɛkoo a ba ni.

“A teleŋndo hoo, mi yaa che Seiyaa Chɛhowaa cheleŋ yooŋgu kɛndɔɔ dimioo a pɛŋgɛi mapuuluei o fondaŋnda cheleŋ o tanda naa niŋ. Nda bɛɛ, ndaa naŋ bɔɔ kaa. Nduyɛ teleŋ o teleŋ, mi ndaa soliŋ Baabuiyo kpeku le nyunala nilaŋ mulioo. Fulamakɔɔlioo wa ni, mi chɔɔlu laalaŋndo dɔwɔɔ o nyɛ nda wa pɛɛkoo wo niŋ.

“Paale pilɛ, mi Elani nyuna ya aa, ‘A laalaŋ pa maa ke fula Mɛlɛka o ba wo chɔluaa cho ni?’ Mi muli aa, ‘Ei, I laalaŋ.’ Mbo chɔm ya nyɛ dimiŋ o Aisaya 11:6-9 niŋndo. Chɔŋ niŋ a paaleleŋ, yaa nɔ yeemɛi le chɔɔloo sinaa tau a Baabuiyo okɔɔ, mi che bɛɛ yaa nɔ iyeema le diomndaŋ veeloo o yaula Seiyaa Chɛhowaa niŋ te.

“Okoŋ kɔɔli, mi Elani nda pɔnɔ ndɔ Bilɛŋ ndaa dɔu baltaŋ a ya, nduyɛ mi yaa tuei laŋ yeela tau, mi che bɛɛ naŋ chue teleŋ bɔɔ le. Ma dimulla maa ya veelu diomndaŋ o yau Maatiu wo niŋ haaa Walta Kiilaa le mi sina nyɛ o sim le waa Kilisiɔŋnɔɔ wo. Mi tosa mɛɛ nda dimi yɛ. Nduyɛ o wɔsi 2016 tɛɛŋ, mi Elani nda Bilɛŋ kandu ya Baabuiyo pɛɛkoo.

“Mi nyɔɔ ndoo hɛnaŋ ya tau te teleŋndo ndoo fuuluu pɛ le Baabuiyo pɛɛkoo a le kɔlaŋ o bɔŋaŋndaŋ. I wa a kɔl kɛndɛ tau le mɛɛ ya wa Baabuiyo pɛɛkoo yɛ. Wɔsioo opilɛ okoŋ kɔɔli, mi sɔla yiŋɔɔ. Mi che bɛɛ I cho niŋ wɔsilaŋ 79, kɛ I sina maa, o nɛi kpeekpeiyo choo ya cho niŋ ni. Chɛhowa dɔu ya sala sanaa a ya chɛlɔɔ mi wa o yuŋgu ndɔ cho ndu piɛiyo chieeŋndo balɔɔ silɔ wo niŋ.”