Babiskui samu na bayimbua na munu
NICK, mpangi mosi ya bakala yina kevuandaka na Oregon, na États-Unis sonikaka: “Na nsungi ya madidi ya mvula 2014, munu vuandaka kuenda zieta na bayimbua na munu zole ya fioti na centre ville, kisika munu vuandaka zinga. Na centre ville, Bambangi ya Yehova vuandaka na mumeseno ya kusamuna na nzila ya bashario na bau. Bavuandaka vuata mbote, mpe bavuandaka pesa mbote na konso muntu yina vuandaka luta mpe bavuandaka sekisa bantu.”
“Bambangi ya Yehova yango vuandaka monisa kimpombo kaka na bantu ve kasi na bayimbua na munu diaka. Kilumbu mosi, Elaine, mpangi ya nketo yina vuandaka samuna na shario na yandi, yandi pesaka bayimbua na munu zole babiskui. Na manima, konso ntangu yina beto vuandaka luta na ntuala ya shario, bayimbua na munu zole vuandaka na nsatu ya kukuenda na Bambangi ya Yehova samu na kusosa ‘babiskui’ na bau.
“Mua bangonda lutaka, bayimbua vuandaka sepela kudia babiskui na bau mpe munu vuandaka sepela na masolo yina beto vuandaka solola na Bambangi ya Yehova. Kasi munu vuandaka sepela ve kusolola na bau mambu mingi. Munu vuandaka na bamvula kuluta 70, mpe munu vuandaka ndimina ve mambu yina Bambangi ya Yehova kendiminaka. Lokola munu lembaka nzutu samu na mambu mingi ya yimbi ya mabundu ya Buklisto, munu monaka mbote kulonguka Biblia munu mosi.
“Na ntangu yango munu vuandaka mona kaka Bambangi ya Yehova na bisika mingi ya kusuasana, bametelema pembeni ya bashario na bau. Bau diaka bavuandaka ntangu nionso na kiese. Bavuandaka pesa ntangu nionso bamvutu na biuvu na munu ya Biblia mpe yasalaka ti munu tudila bau diaka mpenza ntima.
“Kilumbu mosi, Elaine yuvusaka munu: ‘Nge kendimaka ti bibulu kele dikabu yina mekatuka na Nzambi?’ Munu vutusaka: Ee, yakele mutindu yina!’ Na manima Elaine monisaka munu Yezaya 11:6-9. Banda na ntangu yango munu kumaka na nsatu ya kulonguka Biblia, kasi munu vuandaka sepela kaka ve kubaka mikanda ya Bambangi ya Yehova samu na kutanga.
“Na bilumbu yina landaka, munu vuandaka sepela kusolola kintuadi na Elaine mpe bakala na yandi Brent. Bapesaka munu dibanza ya kutanga Biblia kubanda na mukanda ya Matayo tii na mukanda ya Bisalu samu na kuzaba yina zola monisa kuvuanda Muklisto ya kedika. Munu salaka mpe mutindu yina. Ntangu fioti na manima, munu ndimaka ndongokolo ya Biblia kintuadi na Brent mpe nketo na yandi Elaine. Yavuandaka na nsungi ya tiya ya mvula 2016.
“Munu vuandaka vingila na nsatu ya ngolo ndongokolo na munu ya Biblia ya konso sabala mpe kukuenda na balukutakanu na Yinzo ya Kimfumu. Munu bakaka mambote mpe munu kumaka na kiese na kulongukaka mambu yina kele mpenza na Biblia. Na manima ya mvula mosi, munu kumaka Mbangi ya Yehova yina mebaka mbotama. Bubu yayi munu kele na bamvula 79, munu kele mpenza na butondi na mutindu munu mebakusa dibundu ya kedika. Yehova sakumunaka munu na kukotisaka munu na kati ya dibuta ya bisadi na yandi ya kukuikama.”
