“Shaˉhkiˆhkanˍ ve chaw lehˬ chaw htaꞈ ceh tiˉ kʼehˇ˗ehꞈ te piˇ ve maˇ heˆ. Hkuiˇ htaꞈ kaꞈ haꞈ ve yoˬ. Teˇ nyi htaˇ liꞈ kʼoˆ keu leh caꞈ tuˬ awˬ paˇ lo huˉ taˍ ve E˗lehnˍ lehˬ ngaˬ ve hpuiˇ htaꞈ kaꞈ hkaoˍ monˇ caˍ piˇ ve yoˬ. Oˇ htaˇ tanˬ leh ngaˬ oˇ ve teˇ taw lo kʼai ve kʼo, ngaˬ ve hpuiˇ hkaoˍ monˇ caˇ gaˇ ve pa taw, yawˇ hui geh gʼuiˇ kʼai ve yoˬ.”

“Laiˉ ha pa peuˬ hkʼawꞈ nawˉ, ngaˬ Yaˬhoˉvaˬ ve Shaˉhkiˆhkanˍ ve chaw htaꞈ mawˬ daꞈ hkʼeh jaˇ. Ngaˬ ve hpuiˇ kaꞈ yawˇ hui ve hkaoˍ monˇ gʼa caˇ ve dawˇ cawˇ jaˇ leh ngaˬ kaꞈ yawˇ hui geh tawˇ gʼa yaw daꞈ ve dawˇ cawˇ jaˇ. Ngaˬ 70 hkʼawꞈ pawˆ˗oˬ ve pa taw, yawˇ hui geh hkʼa dehꞈ maˇ meuˆ daꞈ gaˇ. Leh Shaˉhkiˆhkanˍ ve chaw aˬ htoꞈ ma htaꞈ yonˍ ve ngaˬ hkʼa dehꞈ maˇ shiˍ. Teˇ ceuˬ kʼo, bon liˇ laiˉ ceuˬ lehˬ ngaˬ nyi ma luˬ tuˬ te laˇ jaw ve pa taw, ngaˬ hkʼaˇ ngaˬ Liꞈ hpu gʼaw ve lehˬ daꞈ˗aˬ tehꞈ dawˇ ve yoˬ.”

“Oˇ ve teˇ yanˇ ngaˬ venˇ hkʼaw lo kʼai htaˇ, Shaˉhkiˆhkanˍ ve chaw liꞈ kʼoˆ keu leh caꞈ tuˬ oˇ kaˬ lo kaꞈ teh taˍ ve htaꞈ ngaˬ gʼa mawˬ ve yoˬ. Yawˇ hui teˇ gʼaˇ le le nyi ma daꞈ leh ha lehˬ puiˉ jaˇ. Ngaˬ na piˇ htaˇ yawˇ hui hkʼaˬ htaˆ kaꞈ Liꞈ hpu htaꞈ cuˇ leh hkʼawꞈ laˇ ve yoˬ. Chi ngaˬ yawˇ hui htaꞈ yonˍ gʼa tuˬ te laˇ ve yoˬ.”

“Teˇ nyi htaˇ E˗lehnˍ ngaˬ htaꞈ na laˇ ve, ‘to nuˇ to shaˆ lehˬ Gʼuiˬ sha ngaˬ hui htaꞈ laꞈ shawnˍ peꞈ laˇ ve hkʼe hpehꞈ ve tehꞈ aˬ puˍ nawˬ yonˍ˗aw laˇ?’ Ngaˬ hkʼawꞈ piˇ ve, ‘awˬ tehˬ yoˬ.’ Hkʼe te leh, Iˉsaˍyaˆ liꞈ 11:6-9 hkʼaw yawˇ ngaˬ htaꞈ nyi tcuh laˇ ve yoˬ. Oˇ htaˇ tanˬ leh ngaˬ Liꞈ hpu htaꞈ kʼawꞈ shiˍ gaˇ ve yoˬ. Yaꞈ hkʼaˇ, ngaˬ Yaˬhoˉvaˬ ve Shaˉhkiˆhkanˍ ve chaw ve liꞈ kʼoˆ maˇ yuˬ gaˇ sheˍ.”

“Oˇ ve teˇ yanˇ tanˬ leh, E˗lehnˍ leh yawˇ ve awˬ hpawˇ Behn geh Liꞈ hpu ve awˬ lawn yaw daꞈ ve ngaˬ dawˇ cawˇ la ve yoˬ. Ngaˬ yawˇ hui geh a ciˉ ceh tiˉ gʼa yaw daꞈ ve htawˇ, ngaˬ dawˇ cawˇ tuˬ te laˇ ve yoˬ. Awˬ tehˬ ve Hkriꞈ yaˇ hkʼaˬ hkʼe hpehꞈ ve htaꞈ ngaˬ shiˍ tuˬ, Maꞈtehnˍ liꞈ te leh Tcuh yaˇ liꞈ hkʼa gaˬ gʼaw nyi tehꞈ yawˇ hui awˬ gʼaˇ peꞈ laˇ ve yoˬ. Ngaˬ gʼaw peuˬ hkʼawꞈ nawˉ maˇ maw, yawˇ huiˉ maˬ geh Liꞈ hpu henˇ tuˬ kʼoˆ piˇ ve yoˬ. Oˇ ve teˇ yanˇ 2016 hkʼawꞈ hpehꞈ ve yoˬ.”

“Teˇ shinˉ le le Liꞈ hpu henˇ ve leh hpawnˬ daꞈ˗e ve awˬ nyi ngaˬ haˆ haˆ gaˬ tcuh gaˇ ve yoˬ. Liꞈ hpu hkʼaw awˬ tehˬ ve aˬ htoꞈ ma htaꞈ maˍ ve ngaˬ gʼa shiˍ htaˇ ha lehˬ jaˇ. Teˇ hkʼawꞈ peuˬ hkʼawꞈ nawˉ ceh kaꞈ ngaˬ Baˆtiˆsaˬ haꞈ yuˬ ve yoˬ. Chi teˇ hkui ngaˬ 79 hkʼawꞈ gaˬ˗oˬ. Yaꞈ hkʼaˇ, ngaˬ awˬ tehˬ ve bon htaꞈ ca mawˬ ve ha lehˬ jaˇ. Ngaˬ Yaˬhoˉvaˬ ve yehˬ kʼa hkʼaw chehˇ la tuˬ ga laˇ ve awˬ bon uiˍ jaˇ.”