Kusolwela Tuwa Likoji
NICK uze atwama mulifuchi lyaOregon, U.S.A, ambile ngwenyi: “Lwola lumwe mumwaka wa 2014 ngwapwile nakutambuka natuwa twami vavali mumbaka muze ngwatwaminenga. Kakavulu Vinjiho jaYehova vemanyinenga mumbaka kana natumatemba twakushindumuna. Vavwalilenga muunyoji kaha nawa vasolwelenga chisambo kuvatu vosena vaze vahichile hakumwesamwesa kukanwa.
“Vaze Vinjiho jaYehova kavasolwelenga kaha chisambo kuvatuko, oloze vasolwelelenga nawa chisambo nakutuwa twami. Likumbi limwe Elaine uze emanyine kukalitemba kakushindumuna ahanyine jimbisiketi tuwa twami. Kufuma vene halikumbi kana nge tuli nakuhita kuze kwemanyinenga Vinjiho jaYehova, tuwa twami vasakilenga kuya kuli vakiko mangana vavahane ‘jimbisiketi.’
“Hatukweji vavavulu tuwa twami vavahanyinenga jimbisiketi, yami nawa ngwalivwishilenga kuwaha kushimutwila navaze Vinjiho jaYehova. Chipwe ngocho, kangwasakilenga kulikata navo chikumako. Halwola kana ngwapwile namyaka yakusemuka yakuzomboka 70, kaha kangwatachikijile vyuma vafwelelele Vinjiho jaYehovako. Hakuwana nge vyuma vanangwilenga mujichachi vyangwivwishile kupihya, ngocho ngwashinganyekele kulinangula Mbimbiliya uka wami.
“Halwola kanelu ngwamwene Vinjiho jaYehova nawa veka vanemana kutumatemba twakushindumuna mumbaka yeka yamunganda yoyimwe. Navakiko vapwilenga nachisambo. Vakumbulwilenga vihula vahulishilenga vatu kuzachisa Mbimbiliya, ngocho echi changulingishile ngufwelele ngwami vyuma vanangula Vinjiho jaYehova vyapwa vyamuchano.
“Likumbi limwe Elaine anguhulishile ngwenyi: ‘Kutala wafwelela ngwove tunyama vapwa wana wakufuma kuli Kalunga tahi?’ Ngwamukumbulwile ngwami ‘Eyo vapwa wana wakufuma kuli Kalunga.’ Kufumaho Elaine angutangililile chisoneka chaIsaya 11:6-9. Kufuma vene haze ngwasakile kutachikiza vyavivulu, oloze kangwasakile kutambula mikanda yavoko.
“Hamakumbi akavangijileho ngwalivwishile kuwaha kushimutwila naElaine nalunga lyenyi Brent. Vangulwezele ngutange mukanda waMateu nakuheta kumukanda waVilinga mangana ngutachikize vyuma atela kulinga muka-Kulishitu wamuchano. Kahomu mukiko ngwalingile. Nakushimbula chiku, kuheta hakachi kamwaka wa 2016 ngwaputukile kulinangula Mbimbiliya naBrent napuwenyi Elaine.
“Chalumingo hichalumingo ngwalivwishilenga kuwaha kulinangula, nakuya kukukunguluka kuZuvo yaWangana. Ngwevwile kuwaha chikuma kutachikiza vyuma yanangula Mbimbiliya. Kahomu mwahichile mwaka umwe, ngwapwile nguChinjiho chaYehova wakumbapachisa. Oholyapwa jino nguli namyaka yakusemuka 79, kaha ngunatachikiza ngwami nguli mukwitava chamuchano. Chikupu vene Yehova nangukisula hakungukafwa ngupwenga mutanga yavangamba jenyi vamukaye kosena.”
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
