“AYinsahu adiña chiwahi bayi neyi kudi antu hohuku ilaña nikudi tuwa twami. Ifuku dimu, Elaine, wemeni kwakwihi nangolofwana, wenkeli tuwa twami tuyedi mabisiketi. Hashimbwili wanyi tuwa twatachikili kulwisha munyonji kulonda tutachiki ‘kuda mabisiketi.’

“Mwahitili tukweji. Tuwa twadiili mabisiketi atwinkeliwu nawa ninami nahanjekeli nawu chanti. Ilaña nakeñeleña wanyi kudiluka nawu. Nadiña nabadika dehi yaaka 70, nawa nelukili wanyi yuma yakuhwelelawu aYinsahu. Hanyima yakunneñesha kudi machechi awaProtestanti, namweni nami natela kudiza Bayibolu ami aweni.

“Haniyi mpinji, namweni aYinsahu amakwawu kukabadiki kakwawu kamusumba, anemani kujingolofwana jawu. Niwena amwekesheleña muzañalu. Ashileñaku maana chikupu kwakula malwihu kuzatisha Bayibolu, nawa chuma chafuminimu, natachikili kuyikuhwelela.

“Ifuku dimu, Elaine wañihwili nindi, ‘Mwakuhwelela nenu anyama hichawaana chatwinkayi Nzambi?’ Namwakwili nami, ‘Eña, dichineluka!’ Kuhiñahu Elaine watañilili Isaya 11:6-9. Iyi vasi yahimpili yitoñojoka yami, hela chakwila nakeñeleña wanyi kutambula nyikanda.

“Hamafuku alondelelihu, twahanjeli naElaine ninfumwindi, Brent, yuma yantiyishili kuwaha. Anlejeli nawu nitañi Matewu kushika kuYilwilu kulonda niluki yuma yabombela mukwikala nayilwilu neyi yaKristu. Dichi natañili. Hashimbwili wanyi, netejeli kudiza Bayibolu naBrent niElaine. Mwadiña mumayinza muchaaka cha 2016.

“Nafwilileña chikupu kudiza Bayibolu mulungu nimulungu nikuya nakupompa Kwitala daWanta. Natiyili kuwaha nimuzañalu kudiza chahosha Bayibolu. Chimwahitili chaaka, napaptisheweli nakwikala Chinsahu. Ichi nidi nayaaka 79, neluki nami inakwenda munjila yalala. Yehova nankiswili hakuñusha muchisaka chindi mudi antu adihana.”