“Jonenogo ne ok ohero ahera ji kende, to ne gihero nyaka guoginago. Chieng’ moro, Elaine ma noyudo ochung’ e bath troli nomiyo guogina ariyogo biskude. Bang’ kanyo, sa asaya ma ne akalo but Jonenogo, guoginago ne dwaroga ni asud but troli mondo Joneno ma ne ni kanyo omigie biskude kendo.

“Dweche moko nokalo. Guoginago nohero chamo biskude ma ne imiyogi, to an namor goyo mbaka gi Jonenogo. Kata kamano, ne ok adwar ng’iyo kodgi ahinya. Ne ajahigni 70 gi wiye, kendo ne ok an gadier ahinya kuom gik ma Joneno noyiego. Nikech ne ok ahero puonj mag kanise mag Protestant, ne aneno ni achak puonjora Muma kenda.

“Najanenoga Joneno mamoko bende kochung’ e bath troli kuonde mamoko e taon ma ne adakieno. Gin bende ne gihero ji ahinya. Ne gidwokoga penjo ma ne an-go ka gitiyo gi Muma, kendo mano nomiyo amedo genogi ahinya.

“Chieng’ moro, Elaine nopenja niya: ‘Be iparo ni le bende gin mich mowuok kuom Nyasaye?’ Ne adwoke ni: ‘Ee, ayie gi wachno!’ Kae to Elaine nosomona bug Isaya 11:6-9. Chakre kanyo, nagombo ng’eyo Muma e okang’ momedore. Kata kamano, ne ok ayie kawo buge mag Joneno mag Jehova.

“Bang’ mano, ne wajobedoga gi mbaka machuok kendo mamit e wi Muma gi Elaine kod Brent jaode. Ne gijiwa ni asom Mathayo nyaka Tich Joote mondo ang’e tiend bedo Jakristo madier. Natimo kamano. Mapiyo bang’ kanyo, nachako puonjora Muma gi Brent kod Elaine. Mano ne en higa mar 2016.

“Naritoga gi siso puonjruokna mar Muma ma juma ka juma kod chokruoge mag kanyakla e Od Romo. Namor ahinya ng’eyo gik ma Muma puonjo. Bang’ higa achiel kama, nobatisa mi abedo Janeno. Sani ajahigni 79, kendo ang’eyo ni an e yo ma tera e ngima. Jehova oseguedha kuom rwaka mondo abed e riwruok mar joge mochiworene.”