“Thuhretute chu mite chungah mai ni lovin, ka ui tête chungah pawh an ṭha hle a. Ni khat chu, nawrlirh bula ding Unaunu Elaine-i chuan ka ui tête chu biscuit a pe a. Chumi hnuah chuan, an nawrlirh bul hnaia kan kal apiangin ka ui tête chuan biscuit beiseiin Thuhretute awmna lama kal phêt an tum ṭhîn a ni.

“Thla eng emaw zât a liam a. Ka ui tête chuan biscuit ei chu tui an tithei hle a, kei pawhin Thuhretute nêna sawihona tâwi tê neih chu nuam ka ti. Mahse, anni chu ka nêl lutuk ngam lo. Kum 70 chuanga upa ka ni tawh a, Thuhretute thurin lah ka hre chiang si lo. Kristian kohhran hrang hrang zirtîrnaa lungawina ka hmuh loh avângin, mahnia Bible zir chu ṭha ber niin ka hre ta a ni.   

“Chutih hun lai chuan, khawpui chhûng hmun danga an thu leh hla pho chhuahna nawrlirh bula ding Thuhretu dangte chu ka hmu leh a. Anni pawh mi hawihhâwm tak an ni a. Ka zawhnate chu Bible aṭanga min chhânsak ṭhin avângin, chu chuan anmahni rinna min neitîr lehzual a ni.

“Ni khat chu, Unaunu Elaine-i’n, ‘Rante hi Pathian hnên aṭanga kan dawn thilpêk an ni tih i ring em?’ tiin min zâwt a. ‘Ring e, ring teh meuh mai!’ tiin ka chhâng a. Unaunu Elaine-i chuan Isaia 11:6-9 thu hi min chhiarsak a. Chuta ṭang chuan, Bible zir duhna ka nei ta a; mahse, Thuhretute tihchhuah thu leh hla chhuahte chu ka la chhiar duh chuang lo.

“Chuta ṭang chuan, Unaunu Elaine-i leh a pasal Brent-a te nêna rei lo te chhûng awmze nei taka sawihona neih ṭhin chu nuam ka ti hle a. Kristian dik nihnain a ken telte hre thiam tûrin Matthaia bu aṭangin Tirhkohte bu thleng chhiar tûrin min fuih a. Tichuan, ka chhiar ta a. A hnu rei vak lo vah, an nupaa Bible min zirpui chu ka remti ta a ni. Chu chu kum 2016 lai hâwl vêl a ni.

“Chawlhkâr chhûnga Bible zir hun tûr leh Kingdom Hall-a inkhâwm hun tûrte chu ka nghâkhlel thei hle a. Bible zirtîrna dik takte ka zir theih avângin nihlawh tak zet ni hian ka inhria. Kum khat aliam hnu rei vak lo vah, Thuhretu pakhat niin baptisma ka chang a. Tûnah chuan kum 79 ka ni tawh a, sakhaw dik ka hmuh avângin ka lâwm hle. Jehova’n a hnêna inpumpêk a chhiahhlawhte zînga mi nia min pawmin mal min sâwm a ni.”