Mabisiketi Abanene Tutali
NICK uje wakala mu Oregon ku America, wasonekele ngwendi: “Kushwa ku mashangumukilo a mwaka wa 2014, njashangumukile kuyayaya hamo na tutali bange babali munjakele na kuya mu mbonge ya mu citingitingi cetu. Simbu yoshe njakele na kuwana Bakaleho banemana ku tutambo twa mawili. Bazalele mwamubwa simbu yoshe, co bakele na kumweswila munu woshe-woshe wakele na kwita.
“Bakaleho bakele na kumwesa ngozi ku banu babangi, co bamwesele lalo ngozi ku tutali bange. Litangwa limo, Elaine uje wemanene kuyehi na katambo wanene mabisiketi tutali bange babali. Kutunda bene haje, simbu yoshe munjakele na kwita ku katambo ka Bakaleho, tutali bange bakele na kukoka mikole na kuya ku Bakaleho mangana babane ‘mabisiketi.’
“Njalingile ngoco ha bingonde byabingi. Tutali bange bakele na kulikuwa mabisiketi yangeco njakele na kuliziba mwamubwa munjakele na kusimutwiya na Bakaleho. Oloni kunjakele na kusimutwiya nabo simbu yailaha. Ha simbu ei njakele na myaka 70, co kunjazibukile mwamubwa bibakulahela Bakaleho. Bilinga bya banu babangi ba mu bulombelo buje bukalishasha ngwabwo bwa baka-Kilistu byapwa byabibi, ngeci njayongwele ngwange njililongesa Mbimbiliya likalyange.
“Ha simbu ei njakele na kuliwana na Bakaleho mu mitambela ya kuliseza-seza ya nganda oku banemana ku tutambo. Boshe bamonekele ngwabo bazema banu. Simbu yoshe bakele na kukumbulula bihula byange kulikwasesa Mbimbiliya, co oku kwanjilingisile njibakulahele manene.
“Litangwa limo Elaine wanjihwile ngwendi: ‘Mukulahela ngweni bimuna bapwa bwana bwa kutunda kuli Njambi ndi?’ Njamukumbulwile ngwange, ‘Eyo njikulahela ngoco.’ Elaine wanjitandelele mukanda wa Isaya 11:6-9. Uje mukanda wanjilingisile njishake kulilongesa Mbimbiliya, oloni kunjashakele kutambula mabulu a Bakaleho.
“Kushwa bene lije litangwa, njakele na kushaka binjakele na kusimutwiya na Elaine na munalume wendi Brent. Banjishongangeyeye ngwabo njitande Mbimbiliya kushangumukila ha mukanda wa Mateo kutwala ha mukanda wa Vilinga, mangana njizibisise byuma byalibungila mu kupwa muka-Kilistu. Co njalingile bene ngoco. Munima ya simbu yaindondo, njashangumukile kulilongesa Mbimbiliya na Brent na Elaine. Njashangumukile kulilongesa Mbimbiliya mu 2016 ha simbu ya cisika.
“Njazemene manene kulilongesa Mbimbiliya na kukunguluka ku Njibo ya Bumwene. Njabwahelelele manene na kuliziba kubezika munjakele na kulilongesa Mbimbiliya. Munima ya mwaka umo, njapwile Mukaleho wa Yehova wa kumbwitika. Njili na myaka 79, co njakandelela manene munjinawana bulombelo bwa busunga. Yehova nanjibezikisa mwananjikwasa njikale mu naanga yendi ya ku sipilitu.”
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
