Yajmoˈoytyë gayetë ja nˈukëts
NICK, tuˈugë yetyëjk mëdiˈibë tsënaapy Oregón (Estados Unidos), duˈun tnimaytyaˈaky: “Mä jëmëjt 2014, jats nwoowtsoˈonyë nˈukëts parëts nëjkx nyajjëditäˈäny sentrë. Jatsoowëtsë nety xëmë naxtë mä nimajtskë Testiigëty twindanëdë karruˈunk, ak oyxyoxyëty, ajëëky amëguˈugëty ets tˈëboˈkx tkäjpxpoˈkxtë pënaty jam näjxtëp.
”Per ja Testiigëty kyaj jeˈeyë yˈoyjyaˈaytyäˈäktë mëdë jäˈäy, nanduˈunën mëdëtsë ja nˈukëty. Tëgok, yëˈë nety wyindënaapy ja karruˈunk tuˈugë toxytyëjk mëdiˈibë xyëwˈäjtypy Elaine ets ta tmooyë gayetë ja nˈukëtyëts. Pääty tëgok tëgokëts jatsoo naxy mä ja karruˈunk twindanëdë, xëmëts jatsoo ja nˈuk jyantsy nyëjkxtë parë yajmoˈoytyët ja gyayetë.
”Duˈun ja xëëw poˈo nyajxy, jyantsy yˈoyjyäˈäwëdë ja uk ko yajmoˈoytyë ja gyayetë, ets ëjts, tats wanaty ngäjpxkojy nmaytyakojy mët ja Testiigëty, jeˈeyë ko kyajts nëgoo jeky ndimmooytyë tiempë. Jatsë netyë njëmëjt naxy 70 ets kyajtsë nety yajxon nnijawë tijaty tukniˈˈijxëdëbë Testiigëty. Kom tëtsë nety nˈixy ko mä wiinkpë relijyonk kyaj tijaty oy ttundë, tats nwinmääy ko oy kots naytyuˈuk nˈëxpëkëdë Biiblyë.
”Mä taabë tiempë, tats nanduˈun nˈijxyë wiinkpë Testiigëty twindanëdë karruˈunk ets jantsy ajëëky amëguˈugëty, xëmë tˈatsoowëmbijttë mëdë Biiblyë tijatyëts nyajtëëw. Päätyëts niˈigyë nmëbëjky tijaty tukniˈˈijxëdëp.
”Tëgok tatsë Elaine xyajtëëy: Wiˈix mˈokwinmay, ¿yëˈëdaa Dios të xytyukmayˈäjtëmë jëyujk animal? Tats nˈatsooy ko yëˈë. Elaine tats ojts xytyukwingugäjpxë Isaías 11:6-9. Desde jaa, tats nnijawëyany tijatyë Biiblyë tukniˈˈijxëp oyëtsë nety nituˈuknëm ngamënëjkxy ja liibrë o rebistë.
”Tëgok tëgokëts jatsoo näjxy, xëmëts ngäjpx nmaytyaktë naa wanaty mëdë Brent etsë Elaine, per mëjwiin kajaats tijaty xytyukniˈˈijxëdë. Yëˈëjëty, tats xyˈanmääytyë etsëts ngäjpxtsoonëdë Biiblyë mä Matewʉ axtë Apostʉlʉty o Hechos parëts nnijawët tidën yˈandijpy ko nbanëjkxëmë Jesusë yˈijxpajtën, tats duˈun nduuny. Ets 2016 naa jaa mä jëmëjt kyujkwaˈkxy, tats ngupëky parëts xyaˈëxpëjktsondäˈägëdë Brent mëdë Elaine.
”Sëmään sëmäänëtsë nety njëjpˈixy nˈëxpëkäˈäny etsëts nëjkxäˈäny reunyonk. Agujk jotkujkëts njantsy nyayjyäˈäwë kots nyajtukniˈˈijxë ja tëyˈäjtënë mä Biiblyë. Ets ko nyajxy tuk jëmëjt, tats nnëbejty, tyam jatsë njëmëjt 79 ets nnijäˈäwëbëts ko tëts nbäätyë tëyˈäjtën. Mëjwiin kajaatsë Jyobaa të xykyunuˈkxy kots mbäät ndukˈitë yäˈädë familyë mëdiˈibë yajpatp abëtsëmy nyaxwinyëdë ets tmëdundë Jyobaa”.
You May Also Like
DIˈIB XËMË NAYAJTËËWËDËP
¿Wiˈixë Jyobaa tyestiigëty dyaˈëxpëktë jäˈäy?
Ko mˈëxpëkët mëdë Jyobaa tyestiigëty namayˈäjtën, mbäät xyajtunyë Biiblyë mëdiˈibë mdimytsyojkënyëˈajtypy. Mbäät nanduˈun xywyoy pënaty mdimywyowaampy, duˈunë mfamilyë o mëtnaymyaayëbë.
