“Opama wa Anamona a Yehova kiyawoniha athuve baani, mbwenye nanabwagaya. Nlabo nimodha Elaine imenlege epaddi ya karinya, oliye wavaha biskoyitu anabwaga. Vano malabo amatene naviraga mburo yole, mwaha wolemeya anabwaga yathamagelesa vevale wihina ‘etakune biskoyitu.’

“Mweri dhowinjhivadhene ovira, anabwa ale olemela otakuna biskoyitu. Miyo gahikanna yaka 70 teto dhithu dhowinjhiva Anamona a Yehova yarumedhiwa miyo kaganonne. Woona wi dhigereja dhowinjhiva gavolowilimimo dhahigukuula, vano miyo othoma omuhudhera Bibliya meeka.

“Mudhidhi yoyo, gowawonesa Anamona a Yehova amodha mburo dhimodha geeddaga musidadi egaali ni karinya dhewa. Naaliwaya yaari athu apama. Aliwa yawakulesa makoho aaga emulabihedhaga Bibliya, eyo yahithukulela nroromelo naaga wenjhedhedheya.

“Nlabo nimodha Elaine ogikoha, ‘We onorumedha wihina anenyama mukono wa Mulugu?’ Miyo omwakula, ‘Hee ginorumedha!’ Nuwindo Elaine ogilerela yolebela ya Isaías 11:6-9. Siyeyo yagithukule murima wihina gimuhudheregeve Bibliya, ofiyera miyo okanna efunelo yowawakela malivuru Anamona a Yehova.

“Obajha labo nenne, miyo wambela ojha mudhidhi wowinjhivene githapanyaga ni Elaine ni mamune Brent. Aliwa ogikongomedha wihina gimwileri Bibliya obajha Mateus ofiyera Atos, wihina gonelemo enatapulela ddi okala mukiristawu eebaribari, siyeyo gerilimmina. Kuvirile mudhidhi wowinjhivene miyo orumedha omuhudhera Bibliya ni Elaine vamodha ni Brent. Eyo yereye yaka ya 2016.

“Miyo goodhiveliwesa ohudhera wehu wa Bibliya ni woona mutugumano sumana dhatedhene. Miyo godhiveliwa vanlubale onona ebaribari anahudhiha Bibliya. Nuuvira mwana yaka miyo obaddiziwa. Peeno ginna yaka 79. Ginotamalela vanlubale mwaha ofwanya webedha webaribari. Yehova ohugireeliha ni oneeti wokala epaddi wa emudhaye ya adhaari enamulabela nuuviheya.”