Epasa tuimbwa twangu mabisiketi
NICK, wamene onkhala ku Oregon, U.S.A., elemba kuti: “Kumayambililo kwa chaka cha 2014, niyamba kunyamula tuimbwa twangu tuŵili poluta kuyanyunga mu tauni yenenzenkhala. Kanyinji-kanyinji a Mboni enzenkhala pakati pa tauni pafupi na tumashelufu twawo twa mabuku. Ove enzevwala luweme ndipo enzepeleka moni mosangalala kuli aliyense angapite.
“Amboni amene awo enzechita vinthu mowama ntima osati tyala na ŵanthu, koma na tuimbwa twangusoti. Nsiku iyakine, Elaine, wamene enzepaname pafupi na kashelufu epasa tuimbwa twangu mabisiketi. Pavuli pa vamene ivi, ulwendo uliwonse wanapita pamene apo, tuimbwa twangu tuŵili twenzefuna kulutasoti kuli a Mboni kuti akatupasekosoti ‘mabisiketi.’
“Mu kupita kwa nthawe, tuimbwa twangu twiyamba kukonda ngako mabisiketi ŵetwenzepasiwa, ndipo newo nenzekonda kukambilana mwachidule mfundo ziyakine na a Mboni amene awo. Koma nenzefunalini kudjailana nawo ngako. Newo nenze kale na vyaka vopitilila 70 ndipo nenzeziŵalini kuti a Mboni okhulupilila votyani. Chifukwa chakuti ninkhala wokhumudwa na matchetchi anyinji a Chikhilisitu, niwona kuti chingankhale chinthu chiweme kuti nikophunzila neka Baibolo.
“Pa nthawe yamene iyi, nenzewonasoti a Mboni ayakine alipaname na tumashelufu twawo twa mabuku m’malo osiyana-siyana mu tauni yamene iyo. Ove nawo enze aweme mitima. Nthawe zonse ove enzeyankha makonsho ŵangu pokatishila ntchito Baibolo ndipo vamene ivi vichitisha kuti niyambe kuŵakhulupilila ngako.
“Nsiku iyakine, Elaine enikonsha kuti, ‘Kansi mwewo mukhulupilila kuti vinyama ni mphaso yofumila kuli Mulungu?’ Newo niyankha kuti, ‘Eye, nukhulupilila ngako!’ Pavuli pake, Elaine eniŵelengela lemba ya Yesaya 11:6-9. Vamene ivi, niye vinichitisha kuti nifunishishe kuphunzila vinyinji vokhuza Baibolo, koma olo n’tetyo, nenzefunalini kulondela buku iliyonse ya a Mboni amene awo.
“M’masiku okonkhapo, nenzesangalala kukambilana mwachidule mfundo zochitisha chidwi na Elaine pamozi na mwanalume wake Brent. Ove eniuja kuti niŵelenge buku ya Mateyu mpaka Machitidwe kuti nimvwishe kuti kunkhala Mkhilisitu wachendi kutanthauza chinji. Ndipo vamene ivi niye venichita. Papita kanthawe katontho, nivomela kuphunzila Baibolo na Brent pamozi na Elaine. Vamene ivi, vichitika nkati mwa chaka cha 2016.
“Newo nenzewamijiwa ngako kuphunzila Baibolo komasoti kuluta kumisonkhano sondo iliyonse. Nenzesangalala ngako ndipo nenzewona kuti ni madaliso kuphunzila vayulaŵila Baibolo. Ndipo papita tyala chaka chimozi nibatizika. Lomba nili na vyaka 79, ndipo nutembeja ngako kuti nifwana chipembezo chachendi. Yehova wanidalisa ponilola kunkhala m’banja yake ya atumiki olipeleka.”
