“Etyi nehika-po Onombangi mba Siovaa avandingi nawa tupu avalingi nawa ovimbwa viange. Nthiki imwe, umwe utiwa o Elaine, afuene povimbwa viage eviavela ovimbolinyu. Konyima yotyo, kapakaleliale omuvo omunyingi ovimbwa avihande okunanapo okapasita kavo opo viliemo ovimbolinyu viavo.

“Apalambe onohanyi ononyingi. Ovimbwa naina viapandele umwe unene ovimbolinyu vina, naame napandele unene etompho nakalele nalio Nombangi mba Siovaa. Mahi ankho hahandele okukala unene epanga liavo. Ame ankho ndyinale omanima alamba po 70, tupu ankho hitavela kuetyi Onombangi mba Siovaa vetavela. Mokonda ankho nasoyeswa no nongeleya ononyingi, pahe ankho ndyisoka umwe vala okutanga Ombimbiliya andyike tyihaende vali kongeleya naike.

“Mokueenda kwomuvo oo, tupu ankho ndyimona vali onombangi ononkhuavo mepundaumbo vetai poutuku-tuku wavo womikanda. Navo ankho ovanthu ovawa. Iya tupu etyi ankho vahanda okulinga, okukumbulula omapulo ovanthu aveho Nombimbiliya, otyo atyinkhuatesako okuveyumba onthumbi.

“Nthiki umwe, Elaine amphulu okuti: Ove utyii okuti ovinyama otyiawa tya Huku? Ame andyiti yoo ndyityii, ngwe anthangela Isaías 11:6-9. Okutuka opo pahe andyihande umwe okulilongesa Ombimbiliya, mahi nkhele ankho nalinga katutu otyinkhe okutambula omukanda.

“Etyi palamba ononthiki mbumwe atukala vali netompho limwe liahasetele-ale na Elaine nomulume wae Brent, mahi lianthyambukisilwe unene. Avamphopila okuti opo ndyityivile okuhetekela Kilisitu, nesukisa okutanga ombimbiliya mo mukanda wa Mateusi nowo Ovilinga. Ngatyo umwe ndyilinga, etyi pakala katutu andyitavela okulongeswa Ombimbiliya na Elaine nomulume wae Brent. Netavela okulongeswa Ombimbiliya pondyovo mo 2016.

“Ankho ndyihambukwa unene okulilongesa Ombimbiliya onosimanu ambuho nokuenda kondyuo yomaliongiyo. Andyityimono umwe okuti nayambwa tupu ndyina ehambu mokonda nanoñgonoka etyi Ombimbiliya tyili ilongesa. Etyi palamba enima like, andyimbatisalwa. Pehepano ndyina omanima 79 iya ndyityii umwe okuti ndyili motyili. Nayambwa unene na Siovaa mokonda oe wamphaka mombunga yae.