“Mboni za Yahova zimwezo zikhambakomedwa kwene-kwene na wanthu. Tsono izo zikhakomedwambo na mbwaya zangu. Ntsiku inango, mkazi munango wakucemeredwa Elaine, omwe akhadaima pafupi na kangolo ka mabukhu adapasa mbwaya zangu ziwiri mabulaxa. Kucokera ntsiku imweyire, kuli-kwentse komwe ndikhayenda, mbwaya zangu zikawona Mboni za Yahova zikhafuna kuyenda kuna iwoko kuti zikatambire mabulaxa.

“Padapita minyezi bzimwebzi bzikucitika, ndipo mbwaya zangu zikhakomedwa kudya mabulaxa, ndipo ine ndikhakomedwa kuceza na Mboni za Yahova. Tsono ndikhambafuna lini kuceza nazo nthawe ikulu. Pa nthawe imweyire ndikhana magole yakupitirira 70 ndipo ndikhadziwa lini bwino-bwino bzomwe Mboni za Yahova zimbakhulupira. Ndikhadagoboka m’mabondo na bzomwe magereja mazinji yacikristau yambapfunzisa ndipopa ndidawona kuti bzikhali bwino kundopfunza ndekha Bibliya.

“Pa nthawe imweyi, ndikhambawona Mboni za Yahova zidaima na tungolo twawo twa mabukhu pa mbuto zakusiyana-siyana mu mzinda ule. Pomwe izo zikhambamusana na wanthu, zikhawonekambo kuti n’zakupfatsa. Ndipo nthawe zentse zikhatawira mibvunzo yangu mwakuphatisa basa Bibliya. Bzimwebzi, bzidandicitisa kuti ndiyambe kumbazikhulupira.

“Ntsiku inango, Elaine adandibvunza kuti: ‘Kodi mumbadziwa kuti bzirombo ni mphaso yakucokera kwa Mulungu?’ Ndidamutawira kuti: ‘Inde nimbadziwa!’ Ndipo Elaine adandiwerengera cinembo ca Zaiya 11:6-9. Kuyambira ntsiku imweyire, ndidayamba kufuna kupfunza Bibliya, napo kuti ndikhafuna lini kuwerenga mabukhu ya Mboni za Yahova.

“Kuyambira ntsiku imweyire, ndidayamba kumbaceza na Elaine pabodzi na bayace, Brent, ndipo nkhani zomwe tikhacezazo zikhandidekera kwene-kwene. Iwo adandiuza kuti ndicifuna, ningawerenge bukhu la Mateu mpaka Mabasa kuti ndibvesese kuti kukhala Mkristau n’ciyani. Ndipo ndidacitadi bzimwebzo. Palibe kutenga nthawe izinji, ndidabvuma kupfunza Bibliya ndipo Brent na Elaine adayamba kumbandipfunzisa. Ndidayamba kupfunza mu cirimo m‘gole la 2016.

“Ndikhafuna kwene-kwene kupfunza Bibliya na kumbayenda ku mitsonkhano sumana iri-yentse. Ndikhakomedwa kwene-kwene kudziwa bzomwe Bibliya limbapfunzisa. Pomwe padapita gole na minyezi yakucepa, ndidabatizidwa ndicikhala Mboni ya Yahova. Tsapano ndina magole 79, ndipo nimbatenda kwene-kwene Yahova thangwe ra kudziwa cadidi. Iye andisimba kwene-kwene mwa kundipasa mwayi wakucita mbali ya atumiki wace.”