“Abaketi aba bali bakisa komma ku bandu bene loli na ku tunimbwa twangu. Isiku limo, Elaine, uyu alimile pabupipi na ka shelufu, atupele amabisiketi utunimbwa twangu tubili. Ukufuma pakabalilo ako, linga tuli pipi ukufika pa ka shelufu, utunimbwa twabukagha ku Baketi ukuti bakatupe kangi amabisiketi.

“Imyesi yakindilepo. Utunimbwa twahobokagha linga batupele amabisiketi kangi une nahobokagha fiyo ukuyobesania mbupimba na Baketi. Loli ngalondagha ukuti njobesanieghe nabo akabalilo akatali. Nali nifyinja ifyakukinda 70 kangi ngamenye kanunu isi Abaketi basubilagha. Panongwa yakuti ngahobokagha na matchalichi gha Chikristu, naketagha ukuti kununu ukuti mmanyileghe Ibaibolo panimwene.

“Pakabalilo aka, nababwene kangi Abaketi abangi ku malo aghangi agha tawuni iyi, balimile pabupipi na mashelufu. Bope bali babumanyani fiyo. Utubalilo tosa abene bamulagha amalalusyo ghangu ukufuma mu Baibolo, isi syalimbangisye ukuti nande ukubasubila fiyo.

“Isiku limo, Elaine alindalusisye ukuti, ‘Ngimba kusubila ukuti ifinyamana kyabupe kyakufuma kwa Kyala?’ Nalyamwile ukuti, ‘Ena, ngusubila.’ Ukufuma apo, Elaine alimbelengile ilemba lya Yesaya 11:6-9. Ukufuma pakabalilo aka, nalondagha ukumanyila Ibaibolo loli ngalondagha ukwambilila kilikyosa ukuti ngabelengeghe ukufuma ku Baketi.

“Amasiku aghakukongapo, nahobokagha fiyo ukuyobesania ifundo mbupimba loli isyakukasya na Elaine nu ndume wake, Brent. Abene balinsumile ukuti ngabelenge ibuku lya Matai ukwakufika ibuku lya Imbombo sya Batumiwa agha ghikuyoba isi ukunkonga Kristu kukusanusya. Kangi syo isi nabombile. Bo akabalilo kakindilepo panandi, nalitike ukuti mmanyileghe Ibaibolo na Brent kangi Elaine. Isi syabombiwe nkyinja kya 2016.

“Ngughulila akabalilo aka nisakumanyilagha Ibaibolo sabata aliwesa nukubuka ku Nyumba ya Bunyafyale. Ndiwalusekelo fiyo panongwa yakumanyila isi Ibaibolo likuyoba. Bo ikyinja kikindilepo, nalyosiwe nukuya yumo wa Baketi ba Yehova. Lino ndi ni fyinja 79, kangi ngundaghisya fiyo panongwa yakuti mmanyile ubwanaloli. Yehova ansayile fiyo mwakundula ukuti niye kukighaba kya mbumba yake ya pa kisu kyosa ikyapasi.”