“Mabait ira, anggan diad saray asok. Aminsan, amay Tasi ya manbabantay diad literature cart et binuntokan toy biskwit so duaran asok. Elaine so ngaran to may Tasi. Manlapu lad saman, kada no nadalanan mi ra, asinggeran iran tampol na saray asok ta manalagar iray biskwit da.

“Linmabas so pigaran bulan ya onman lan lanang so nagagawa. Legan ya mamangan na biskwit iray asok, siak balet, mimiistoryaan ak ed saray Tasi. Pero antikey labat ta agak masyadon palagay. Masulok lan 70 so taon ko ed saman, tan agko masyadon kabisado so papanisiaan na saray Tasi. Sakey ni, agak kompormi ed ibabangat na nanduruman relihyon na Protestanti, kanian say kuan kod sarilik, ‘Mas maong no aralen kon bukor so Biblia.’

“No oonla ak ed nanduruman lugar ed syudad mi, wala met iray nanenengneng kon Tasi ya akaalagey ed abay na literature cart da. Mabaibait met ira, tan no walay tepet kod sikara, lanang dan ibabase ed Biblia so ebat da kanian nagmaliw lan palagay so loob ko ed saray Tasi.

“Aminsan, tinepetan ak nen Elaine, ‘Manisia kayo Uncle ya regalo na Dios ed sikatayo iray ayayep?’ Say kuan ko, ‘Ay on a!’ Insan imbasa tod siak so Isaias 11:6-9. Lapud saman, lalo ak ya nainteresan ed Biblia, pero agak nin siansia mangaala na publikasyon na saray Tasi.

“Diad tinmutumbok iran agew, lanang kon nakakatongtong si Elaine tan say asawa ton si Brent tungkol ed Biblia. Naliliketan ak anggano antikey labat so istoryaan mi. In-suggest dad siak ya basaen koy libro na Mateo anggad Gawa pian natalosan ko no antoy labay ya ibaga na pagmaliw ya tuan Kristiano, kanian binasak. Insan nen kapegleyan na 2016, nampa-Bible study ak lad si Brent tan Elaine.

“Eksayted ak kada no Bible study mi tan labalabay koy miaral ed Kingdom Hall. Malikeliket ak ed saray nanaaralan kod Biblia. Kayari labat na masulok ya sakey taon, nampabautismo ak. Natan et 79 ko la. Misalsalamat ak ta nalmok so tuan relihyon tan tinanggap to ak nen Aman Jehova pian magmaliw ya parte na pamilya to.”