Brel el Kelir a Chermek
A NICK el kiei er a beluu er Oregon el ngar er a Merikel a kmo, “A uchelel a 2014 e a kulemuchel ngak me a chermek el bilis el merael er a chelsel a beluu.” A Resioning a mle blechoel ngar tiang lolab a cart el mui er a babier. Te kmal mle ungil kltmokl e blechoel el smile el mora rechad el me engelakl.
“Tirka dimlak di lungil omerellir el mora rechad te dirrek el kmal mle ungil el mora chermek el bilis. A ta er a klebesei e a Elaine el ngii a mle dechor er bita er a ta er aika el cart a milsterir aika el chermek a brel el kelel a bilis. Uriul er tiang e sel ta ki bo morael e a chermek a mle sorir el merael el mo osiik er tia el ‘basio er a brel.’
“Ngmlo chuib a sesei el buil. Aika el chermek a kmal mle ungil a rengrir er aika el kelir e ngak a mle dmeu a renguk el mengedecheduch er a Resioning. Engdi ngdimlak el soak el kmal mo kmeed er tir. Ngak a mla mo okeuid me a derengel a rekik. Ngdirrek el dimlak kudengei a klaumerang er tir. Ngdimlak lungil a renguk er aike el betok el klechelid el mla er ngii me a kulemdasu el kmo ngbai di ungil a kusuub el di ngak el tang.
“Ngar tiakid el taem e ak milsterir a relmuut el bebil er a Resioning el ngar er a kakerous el basio er a belumam lolab a cart er tir. Tirka dirrek el kmal mle ungil a blekerdelir. Te mle blechoel longer a kerik lousbech er a Biblia e rirellak el mo oumerang er tir.
“A ta er a klebesei e a Elaine uleker er ngak el kmo, ‘Kau koumerang el kmo a charm a sengk el mlara Dios?’ Me ak dilu er ngii el kmo, ‘Chochoi, ak mera el oumerang er tiang!’ Me a Elaine a chiliuii el mei er ngak a Isaia 11:6-9. Seikid e ngkmal mlo soak el mesuub el kirel a Biblia engdi ngdirk dimlak el soak el melai a babier er a Resioning.
“Ngar aike el uleak uriul el sils e ngmle dmeu a renguk el telkib el mengedecheduch er a Elaine me a bechil er a Brent. Te dilu er ngak el kmo ngungil kunguiu er a babier er a Mateus el mora Rellir me bo kudengelii a belkul a bo doltirakl er a Kristus. Me tiakid ak rirellii. Kedeb el taem el uriul e ak kilengei el mo mesuub a Biblia lobengkel a Brent me a Elaine. Tia mle melengel a rak er a 2016.
“Ak ulemes el beduluchei el kirel a omesubek er a bek el sandei me a dirrek el miting er a Blil a Ongdibel. Ta el rak er uriul e ak miltecholb el ta er a Sioning. Chelecha e ngmla mo 79 a rekik e kmal ungil medengei el kmo ak ngar er a melemalt el rael. A Jehovah mla omekngeltengat er ngak e rullak el mo chedal a telungalek er ngii.”
