“Matemue a Yehowa akhalele mumonesela athu gisemo, amonesele nji jimbua jiami gisemo. Lusugu lumoshi phangi Elaine wakhalele ya gumagana gu présentoirs mobiles wahanele jimbua jiami mbadi Biscuits. Gungima, masugu agasue tuakhalele mubalega hehi nu présentoirs, jimbua jiami jiakhalele munana shinga hagula jiye gudi Matemue a Yehowa ajihane Biscuits.

“Mbenji jiavula jiabalegele. Jimbua jiami jiasuangulugile nu Biscuits, uvi ame ngasuagulugile nu maga tuakhalele muta nu Matemue a Yehowa. Uvi, ngakhalelego mutshigina guta nawo maga avula. Ngakhalele nu ivo 70, ngakhalelego mujiya muabonga gutshigina gua Matemue a Yehowa. Ngakhalelego nji musuangulunga luko nu ikombelelo iko, ikhale ngenyi ngakhalele mutangiza egi idi ndaga yabonga gulonguga Biblia ame hakhami.

“Gungima, ngamonele Matemue ako a Yehowa gukhanda iko ya dimbo ya gumagana gu présentoirs mobiles. Ene nji akhalele nu gisemo. Akhalele muhana mvutu jiakhalele mukatuga mu Biblia gu mihu yami yagasue, ndaga yene yangutumine ha guashila diago mutshima.

“Lusugu lumoshi, Elaine wanguhudile egi: ‘Wana jiya egi shitu jidi kado yakatugile gudi Nzambi?’ Ngazuelele egi, ‘Ayi, ngana jiya egi idi ngenyi!’ Gungima Elaine watangele Yeshaya 11:6-9. Ngakhalele mutshigina gulonguga Biblia, uvi ngakhalelego mutshigina guzula mikanda ya Matemue a Yehowa.

“Masugu alanduile, ngasuangulugile nu maga azonda tuatele nu Elaine nu mulumi’enji Brent. Angutogele ha gutanga mukanda wa Matayo uu nu gu Makalegelo hagula ngujiye gula gukhala Muklisto wa giamatshidia gudi mukotelesa itshi. Ngatangele mikanda yene. Masugu azonda gungima ngatshiginyile gulongunga nawo Biblia. Yakhalele mu 2016.

“Ngalanduile gulonguga Biblia phoso nu phoso nu guya mu gudibungisa mu Inzo ya Ufumu. Ngakhalele nu gusuanguluga ha gujiya ndaga Biblia yana zuela diago. Gungima dia givo gimoshi nu ndambo ngabatijiwe. Mangino gudi nu ivo 79, ngumujiya egi ngudi mu gikombelelo gia giamatshidia. Yehowa wangukuatesele ha gungina mukatshi dia fami ya akombeledi enji a ha mavu agasue.”