»Ο Μάρτυρες να ισινέ λατσσέ σάντε ι τζενέντζαρ, αλλά μι τζουκλέντζαρ-ντα. Εκ ντιβές, η Ιλέιν, σο ισινέ κο σταντ, ντινάς μπισκότα μι ντουέ χουρντέ τζουκλέντε. Σοράν ανταλέσταρ, κάνα-ντα νακχάας οτθάρ, ο τζουκελά ταρτίνενας-μαν κο Μάρτυρες για τι χαν μπισκότα.

»Ο μασεκά νακχένας. Ο τζουκελά μπεϊντίνενας πουμαρέ μπισκότα, ντα με μπεϊντίναβας ο λάφι σο κεράβας ι Μαρτυρέντζαρ. Σακιντίναβας όμως τι πουτράβ-μαν πο μπουτ. Νακχλόμας ο 70 ντα να ισινόμας σίγουρος οντουλένγκε σο πακιάνα ο Μάρτυρες. Επειδή να αρακχλόμας οντουβά σο μανγκάβας κο Προτεσταντικά κχανγκιριά, αμντίναβας ότι ισινέ πο λατσσό τι σικλιαράβ-μαν κατά Γραφή κορκορό.

»Οντουβά βακίτι, ντικχάβας γιαβερέ-ντα Μαρτυρέν τι τθερέν σταντ μπουτέ τθανέντε αντρέ κι πόλη. Βον-ντα πάντα σικαβένας λατσσιπέ. Κο ερωτήσεις σο κεράβας λένγκε απαντίνενας κατά Αγία Γραφή, ντα αντικάς, η μπέσα σο τθεράβας λένγκε μπαριόλας.

»Εκ ντιβές η Ιλέιν πουτσλάς-μαν: “Πακιάσα ότι ο ζώα ισί δώρος κατά Ντεβέλ;” Βακερντόμ λάκε: “Βα, πακιάβα-λες!” Αζομάν η Ιλέιν σικαντάς μάνγκε ο εδάφια Ησαΐας 11:​6-9. Ατσσιλόμ πουταρντέ μόσαρ, αλλά ατζέ-ντα αζομάν σακιντίναβας τι λαβ έντυπα.

»Ο γιαβερά ντιβεσά, κεράας λάφι χάνικ σαάτι αλλά σημαντικέ πραγματένγκε λάσαρ ντα λάκε ρομέσαρ, σο βακερένα λέσκε Μπρεντ. Βακερντέ μάνγκε τι διαβάναβ κατά Ματθαίος μέχρι κο Πράξεις για τι αγαβάβ σο μανγκέλα τι βακερέλ τι αβάς σαρ ο Χριστός. Κερντόμ οντουβά σο βακερντέ μάνγκε. Χάνικ πο σοράν, μανγκλόμ τι κεράβ μελέτη λέντζαρ. Ανταβά αβιλό-πες κο 2016 κο νιλάι.

»Κάθε εβδομάδα, μπεσάβας σαρ σαρ τι αβέλ ο σαάτι τι κεράβ μι μελέτη ντα τι τζαβ κο συναθροίσεις κι Αίθουσα Βασιλείας. Ισινόμας μπουτ ευτυχισμέ σο σικλιάβας σο βακερέλα μπαγιά η Αγία Γραφή. Σοράν από εκ μπρες ντα πο μπουτ, μπολντιλόμ σαρ Μάρτυρας ι Ιεχωβάσκο. Ακανά, σο ισινόμ 79 μπρεσένγκο, τζανάβα ότι πφιράβα κο σωστός ντρομ. Ο Ιεχωβά τσσουντάς-μαν αντρέ πι φαμιλιάτε, ντα ανταβά ισί μπαρί ευλογία μάνγκε».