“Tena nisoa fanahy Vavolombeloni-Jehovah rey. Tsy tamin’olo avao fa ndre tamy alikako rey koa. Ndraiky andro, nameani-Elaine biskỳ anakalikako roe rey. Zay moa ty anarani-ampela nitsanga tanilani-tablò teo iny. Tafarani-zay, saky nihanarìny ani-tablò iny zahay le ta handeha amy Vavolombeloni-Jehovah rey teny avao alika rey soa hahazo biskỳ.

“Nandeha ty fotoa, fa vola maromaro lasa zay. Lasa nahazo tavy ani-biskỳ baka amy Vavolombeloni-Jehovah rey alikako rey, le zaho koa lasa nitea niresaky amin-drozy. Fe tsy tena ta hiresaky ela amin-drozy aho. Fa 70 tao mahery aho, sady tsy tena haiko hoe ino ty raha inoani-Vavolombeloni-Jehovah. Fa maro ty fivavaha nandiso fanantenà ahy ka nieritseritsy aho hoe aleo aho mivavaky an-tranoko ao avao, le zaho avao ro mandiniky ty raha volanini-Baiboly.

“Tamy zay koa, mbo nahita Vavolombeloni-Jehovah hafa aho tamy pilasy hafa tan-tanà eo, nitsanga tanilani-tablò fitorian-drozy eo rozy. Tena nisoa fanahy koa rozy. Nivalean-drozy baka amy Baiboly ao iaby ze fanontanea napetrako. Lasa nihanatoky an-drozy aho vokatsini-zay.

“Nanontany ahy Elaine ndraiky zay hoe: ‘Mino va iha hoe fanomeza baka amy Ndranahary ty biby?’ ‘Eka’ hoasako! Bakeo nivakini-Elaine tamiko ty Isaia 11:6-9. Nanomboky teo, le lasa ta hahay ze raha volanini-Baiboly aho, fe zaho mbo tsy nety nandramby boky noho gazety baka amin-drozy.

“Nanao fiaraha midiniky kelikely niaraky tamy Elaine noho Brent valiny aho, andro vitsivitsy tafarani-zay. Tena niteako ty raha niresahinay tamy fotoa zay! Nanoro hevitsy ahy rozy mba hamaky ty bokini-Matio zisiky amy Asan’ny Apostoly, amy zay ho haiko soa ty dikani-hoe manahaky ani-Kristy. Le nataoko vatany raha zay. Tsy ela tafarani-zay, zany hoe tamy tao 2016, le naneky hianatsy Baiboly niaraky tamy Brent noho Elaine aho.

“Lasa fa tsy niliniko ty fotoa hianarako Baiboly sankerinandro noho hanatreha fivoria amy Efitrano Fanjakà any. Nifalifaly biby aho fa nahay ze tena ampianarini-Baiboly. Tao raiky mahery tafarani-zay aho natao batisa, ka lasa Vavolombeloni-Jehovah. Fa 79 tao aho henanizao, le tena falifaly aho satria nahita ty fivavaha marina. Nitahini-Jehovah aho ka nengany ho tafilitsy anatini-fianakaviany amy tany toy iaby.”