De da dee dagu busukutu
WAN womi di de ta kai Nick di ta libi a Oregon, di dë na Amëëkanköndë, bi taki taa: „A bigi u di jaa 2014, mi bi bigi tja dee tu piki dagu u mi go waka a di pisiwata ka mi bi ta libi. Dee Jehovah Kotoigi bi lo’ u dë taanputaanpu a di buku wagi u de bandja, a di foto ganda. De bi ta bisi hanse, söseei de bi ta dë waiwai ta da hii sëmbë odi.”
„Dee Kotoigi an bi ta libi bunu ku sëmbë nöö, ma de bi libi bunu ku dee dagu u mi tu. Wan daka, wan sisa de kai Elaine bi taanpu a di buku wagi bandja, hën a da dee tu piki dagu u mi busukutu u de njan. Baka di dë, hiniwan juu te mi ku dee dagu u mi bi ta pasa zuntu ku di buku wagi, nöö dee dagu bi ta mbei möiti u go a dee Kotoigi u go suku busukutu.
„Sö u bi ta du sömëni liba longi. Dee dagu bi ta wai u feni busukutu u de njan, nöö mi bi ta wai u da woto kölö sö ku dee Kotoigi. Ma ma bi ta kë fan longi ku de. Mi bi pasa 70 jaa kaa, nöö ma bi sabi andi dee Kotoigi bi ta biibi. Boiti di dë, sömëni keiki di ta kai deseei Keesitu sëmbë bi du soni di bi mbei mi fii bookosaka. Fëën mbei mi bi pakisei taa a möön bunu u mi ta lei soni u Bëibel mi wanwan.
„A di pisiten dë seei, mi bi lo’ u si woto Kotoigi taanputaanpu a peipei kamian u di foto, ku di bukuwagi u de. Deseei bi ta dë wajawaja ku sëmbë tu. Nöö hii juu de bi ta piki dee hakisi u mi ku di Bëibel. Fëën mbei mi bi ko ta möön futoou de.
„Wan daka, hën Elaine hakisi mi taa: ’I ta biibi taa dee mbeti da wan kado di Gadu da u ö?’ Hën mi piki ën taa: ’Aai, mi ta biibi ën!’ Hën Elaine lesi Jesaaja 11:6-9 da mi. Di soni dë bi mbei mi bi kë lei soni u Bëibel. Ma tökuseei ma bi kë tei na wan soni a dee Jehovah Kotoigi u lesi.
„Mi bi ta wai seei taa mi ku Elaine ku hën manu Brent, bi ta da wanlö sipan woto kölö sö. De bi da mi taanga u mi lesi di buku u Mateosi te go miti Tjabukama, sö taa mi bi sa ko fusutan andi a kë taki u dë wan tuutuu Keesitu sëmbë. Nöö hën mi du andi de taki. An bi tei longi möön seei, hën mi bigi lei soni u Bëibel ku Brent ku Elaine. Di soni aki bi pasa a di jaa 2016.
„Mi bi lobi di lei di mi bi ta lei soni u Bëibel hiniwan wiki, söseei di go di mi bi nango a dee komakandi a di Könuköndë zali. Mi ta wai seei taa mi ko sabi andi di Bëibel ta lei u tuutuu. Baka wan jaa sö, hën mi dopu ko dë wan Jehovah Kotoigi. Nöunöu mi abi 79 jaa, nöö mi ta wai seei taa mi ko feni di tuutuu biibi. Jehovah mbei mi feni gaan bunu, u di a mbei mi ko dë wan dinima fëën.”
