Bi̱ Testigo ni̱ndxu̱ún míjíinʼ xa̱bu̱ gajmiún xúgíinʼ, asndu gajmiún xuñúnʼ. Mbóoʼ mbiʼi niwi̱ji̱ náa carrito mbáa a̱ʼgu̱ mbiʼyuu Elaine, bi̱ nixnúún galleta mu̱phu̱ a̱jmi̱i̱n xuñúnʼ. Nda̱wa̱á dí rúʼko̱, mámbá índo̱ nanújngoʼ ikhí, nagáñún xuñúnʼ nagún ‹náa esquina dí rígá galleta›.

Xúʼko̱ ni̱jkha̱ ranújngoo gu̱nʼ. Xuñúʼ ninigu̱u̱nʼ galleta dí nuxnún ga̱jma̱a̱ ikhúún ninigu̱ʼ dí natamijná gajmíʼ Testigo. Mú ginii, na̱nguá má ninigu̱ʼ wéñuuʼ. Numuu rí gúʼdoo má 70 tsiguʼ ga̱jma̱a̱ naku̱mu̱ʼ dí nduwaʼ nindxu̱u̱ dí nusngáa bi̱ Testigo. Ma̱ngaa ga̱jma̱a̱ numuu rí xóo ndi̱yo̱o̱ náa guʼwá ndxajkun nánguá ninigu̱ʼ maʼgá, niku̱mu̱ʼ rí itháan májánʼ manigajmaa mbáwún Biblia.

Nákha má ikhú ndi̱ñu̱u̱n itháan Testigo rí wájun ga̱jma̱a̱ carrito ndrígu̱ún náa mixtiʼkhu colonia ndrígóo xuajen. Ikhiin mangiin ni̱ndxu̱ún míjíinʼ xa̱bu̱. Índo̱ naniu̱u̱n graxe̱, ikhiin nuriʼña̱a̱ ga̱jma̱a̱ Biblia, ikha jngóo nigíʼdu̱u̱ niku̱mu̱ʼ ka̱ñu̱u̱n itháan.

Mbóʼ mbiʼi, Elaine nirajxu̱ʼ: ‹Naku̱ma̱a̱ʼ ikháán dí xujkhúʼ ni̱ndxu̱ún mbá regalo dí Dios nixnúlú ráʼ.› Ikhúún niriʼñuu dí ‹xúʼko̱›. Ga̱jma̱a̱ ikhú ikhaa niguxnuu dí naʼthí náa Isaías 11:6-9. Asndu má nákha ikhú nixtiʼkhu̱u̱ xóo niku̱mu̱ʼ, mú, xóó tséjkhá ka̱yo̱ʼ nimbá i̱yi̱i̱ʼ.

Nda̱wa̱á nitamijná gajmuʼ itháan mi̱jnu̱ʼ Elaine ga̱jma̱a̱ ajmbio̱o̱ bi̱ mbiʼyuu Brent. Nithu̱nʼ magúxnuu náa Mateo asndu Hechos mu makro̱ʼo̱ʼ ndiéjunʼ eyoo gáʼthúu̱n dí maʼgá kidxuuʼ Cristo. Xúʼko̱ má ni̱ni̱. Nda̱wa̱á, ni̱thu̱u̱n má rí ma̱ndoo manigajma̱a̱ gajmuʼ Brent ga̱jma̱a̱ Elaine. Rúʼko̱ nirígá índo̱ naʼni ta̱pha̱ tsiguʼ 2016.

Asndu nadxuu a̱jkiu̱nʼ manigajma̱a̱ mámbá xmáná dí naʼsngáa náa Biblia ga̱jma̱a̱ rí maʼgá reunión. Nadxuu a̱jkiu̱nʼ ga̱jma̱a̱ naxna̱a̱ núma̱aʼ numuu rí nandoo najmañuʼ dí naʼsngáa náa Biblia. Mbá tsiguʼ nda̱wa̱á nijngúnʼ iyááʼ. Rí xúgi̱ gúʼdoʼ 79 tsiguʼ, ga̱jma̱a̱ nda̱yo̱o̱ dí na̱jkhá náa kamba̱a̱ dí nindxu̱u̱ jmbu. Jeobá niʼni tsajkurámúnʼ numuu rí xtáá náa xuajñuu náa kúwá bi̱ nuni̱ ñajuunʼ ikhaa náa xúgíʼ tsu̱du̱u̱ numbaaʼ”.