Bisikỳ Hoahy i Amboako Rey
MITOBOKE a Oregon, a Etazonia agne ty Nick. Hoe reke: “Nanomboke ninday i amboako kedekede roe rey nitsangatsanga raho, tamy ty voalohan-doha ty taogne 2014. Misy Vavolombelo i Jehovah rezay mateteke manao fampirantiagne boke ara-baiboly an-drova ama’ay ey. Milamigne soa ty akanjo iareo. Salamae iareo iaby ka ze ndaty mandriogne an-dalagne ey sady somilake iareo naho fa manao izay.
“Soa fagnahy iareo. Faie tsy amo o ndatio avao iareo ro soa fagnahy. Naho fa nandriogne tamy i toeragne nanoa iareo fampirantiagney eo ohatse zahay amy i amboako rey, le nimey ze Vavolombelogne raike atao tihoe Elaine zay, bisikỳ i amboako rey. Naho fa nandeha narine i toeragne anoa iareo fampiratiagney zahay tafara izay, le naina i amboako rey handeha mbamy iareo mbeo avao, amy izay mahazo bisikỳ.
“Lava nandalo tamy iareo teo avao zahay amy i amboako rey tagnate ty volagne maromaro tafara izay. Nifale i amboako rey naho fa nihinagne i bisikỳ nimey iareo rey, le nahafale ahy ka ty nifampirehake kedekede tamy iareo. Faie nisalasala ty hifandrambe bey amy iareo raho. Fa ni-70 taogne mahery raho tamy izay, sady mbe tsy tena nihaiko ka ty raha inoa o iareo. Nidiso tamà tamy ty raha natao o Fivavahagne Protestantao ka raho, hafarako nieretseretse tie ndra aleoko mianatse raike o Baibolio avao.
“Nahatrea Vavolombelo i Jehovah hafa nanao fampirantiagne tamy ty toeragne sambe hafa ka raho tagnate ze fotoagne zay. Soa fagnahy ka iareo. Lava valea iareo boake agnate Baiboly ao avao ze raha agnonteneako, hafara’e nihanitombo ty fatokisako iareo.
“Nagnontane ahy hoe izao ty Elaine tie indraike: ‘Mino vao rehe tie fagnomezagne boake aman’Andrianagnahare o bibio?’ Le hoe raho: ‘Ie, tena mino izay raho.’ Nivakie i Elaine tamako ty Isaia 11:6-9 naho fa niavy eo. Nite hianatse Baiboly raho nanomboke tamy izay, faie mbe nisalasala ty handrambe i boke iareo rey avao.
“Ie nimaray igne, le nifampirehake kedekede tamy i Elaine naho i Brent vali’e raho. Tena niteako ty raha nidebàgne’ay. Nampamakie iareo ty boke i Matio hatrake amy ty Asan’ny Apostoly raho mba hahafantarako tie manao akore vata’e ze o tena Kristiana zao. Le nanoeko zay. Tsy ela tafara izay, le nagneke hianatse Baiboly amy i Brent naho i Elaine raho. Tan-tegnategna ty taogne 2016 tamy izay.
“Tsy ligneko ty hianaragne Baiboly isan-keregnandro naho ty hivoriagne amy i Anjomba i Fanjakagney agne. Le vata’e fale raho mahafantatse ty raha tena ampianare ty Baiboly. Natao badisa raho tao’e raike mahery kedekede tafara izay. Fa 79 taogne raho tie amy izao. Rese lahatse raho fa mandeha amy i lalagne maregney. Nitahie i Jehovah raho, le nampea’e mba ho agnisa ty keleiagne manompo aze.”
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
