Ve Lu Nan Aniwaav Av Biskiiti
ORGEN hen kpentar u Oregon, ken tar u Amerika, iti na ér Nik, a nger ér: “Ken mhii u inyom i 2014 la, m hii u duen a aniwaav av uhar zenden a ve ken atô geri, hen ijiir i ya wam lu la. Hanma shighe yô, Mbashiada ve lu hen ijiir ne, ve ver akeke a tuur ityakeda, ve tile her ikyua, ve wuha iyol tsembelee, shi hanma or u nan va kar her ikyua cii yô, ve sugh nan sar sar.
“Lu ior tseegh Mbashiada mbara lu eren a ve doo doo ga. Ve lu eren a aniwaav av kpa doo doo. Sha iyange igen la, Kwaseshiada ugen u tile ikyua a akeke a tuur ityakeda la yô, iti na ér Elaine, na aniwaav av mba uhar mbara biskiiti. Eren nahan yô, hanma shighe mea due a aniwaav mbara mea va sôôn a ve hen ijiir la je maa, ve gba urugh mo yemen hen ape Mbashiada ve lu la, ér i za na ve biskiiti.
“Kwagh ne za hemen nahan iwer imôngo. Hen shighe ne, Mbashiada mbara lu nan aniwaav av biskiiti, mo di m lu lamen a ve kpuaa kpuaa. Yange m u soo u lamen a ve kpishi ga. Hen shighe ne m hemba anyom 70, shi m fa kwagh u Mbashiada na jighjigh a mi jighilii ga. Er ucôôci mba Mbaprotestanti kpishi vande duen mo ishima yô, m nenge mer guda me hen Bibilo iyol yam.
“Hen shighe ne, m lu nengen a Mbashiada mbagenev kpa hen geri la, mba yange ve ver akeke a tuur ityakeda ve tile her ikyua yô. Mbara kpa lu eren a mo doo doo. Hanma mpin u yange mea pine ve sha kwagh u ken Bibilo cii yô, ve nam mlumun sha mi. Kwagh la na yô, m seer nan ve jighjigh.
“Sha iyange igen la Elaine pinem ér, ‘U na jighjigh wer ka Aôndo a ne se annyamev yee?’ M kaa a na mer, ‘Een, m na jighjigh!’ Elaine maa bugh Bibilo na ôrom Yesaia 11:6-9. Hii shighe la je maa gba sarem mo u henen Bibilo. Kpa m gema u soo u ngohol takeda môm hen Mbashiada za ôron ga.
“Hen ayange la, m lu lamen vea Elaine kua nom na Brent. Iliam yase yange i lihe ga kpa, hanma shighe yô m zua a kwagh u wasen mo kpishi. Yange ve kaa a mo ér m hii u ôron Bibilo ken takeda u Mateu zan zan Mpase, tsô me fa er i gbe u Orkristu u mimi nana eren kwagh yô. M eren nahan yô, ica kera gba je maa m lumun mer Brent vea Elaine ve hen Bibilo a mo. Kwagh ne lu ken uwer u Jun, 2016.
“Hanma kasua yô, yange i torough mo iyol u henen Bibilo shi zan mbamkombo ken Iyou i Tartor kpen kpen. Yange saan mo iyol kpishi er m lu henen kwagh u Bibilo i tese la jim jim yô. M hen Bibilo inyom i môm bee pelegh inyom igen kpuaa tseegh maa, i erem batisema, m hingir Orshiada. M ngu anyom 79 hegen, shi saan mo iyol kpishi er m zua a kwaghaôndo u mimi yô. Yehova er a mo doo kpishi, er a ne ian m va lu ken mbacivir un mba sha tar cii, mba ve lu tsombor na la yô.”
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
