“Ɛmɛnyi ɛsɔ waki la dionga di’ɔlɔlɔ aha tsho otsha le anto, koko ndo otsha le tɔfɔfɔ tami. Lushi lɔmɔtshi, Elaine laki suke la mɛsa wanɛwɔ ekanda akasha tɔfɔfɔ tami biskwiti. Oma laasɔ, tɔfɔfɔ tɔsɔ takatatɛ shimbɔshimbɔ dia ntshɔ otsha ‘lɛnɛ akawakitsha biskwiti ɛsɔ.’

“Ngɔndɔ efula yakete. Tɔfɔfɔ tɔsɔ takangɛnangɛna biskwiti ɛsɔ ndo dimi lawɔ lakangɛnangɛna sawo dia lo tshena pe diakamasawola l’Ɛmɛnyi ɛsɔ. Koko lakengengaka dia monga la lɔngɛnyi l’efula la wɔ. Laasɔ ko laki lambolekanya ɛnɔnyi 70, ndo dimi kombeyaka shikaa dietawɔ di’Ɛmɛnyi wa Jehowa. Lam’ele ɛtɛmwɛlɔ efula w’Akristo wakambisha sɔnyi, lakafɔnya dia ndeka dimɛna dimi mbeka Bible lo dimamɛ.

“L’etena kɛsɔ, lakɛnyi Ɛmɛnyi wa Jehowa ekina l’ahole wotshikitanyi wa l’osomba wemadi suke la mɛsa wanɛwɔ ekanda. Vɔ lawɔ wakasawolaka l’anto la lɔngɛnyi tshɛ. Vɔ wakambisha ekadimwelo w’oma lo Bible lo ambola waki la mi ndo oma laasɔ, wɛkamu waki la mi otsha le wɔ wakatatɛ mpama.

“Lushi lɔmɔtshi, Elaine akamimbola ate: ‘Onde wɛ mbetawɔka dia waa nyama yekɔ weshasha w’oma le Nzambi?’ Lakokadimola nte: ‘Eelo, dimi mbeyaka.’ Ko Elaine akambadiyɛ Isaya 11:6-9. Dui sɔ diakayotshikitanya ekanelo kami ka yimba, kaanga mbele polo laasɔ ko laakengenga dia nongola ekanda awɔ.

“Lo nshi yakayele, takakɛtshanya awui amɔtshi lo tshena pe dimi la Elaine l’omɛnde, Brent. Vɔ wakanɔmbɛ dia mbadia Mateo polo lo Etsha dia dimi nshihodia kɛnɛ kalembetshiya monga Okristo wa mɛtɛ. Ko lakasale dui sɔ. Kombeta edja oma laasɔ, laketawɔ dia mbeka Bible dimi la Brent la Elaine. Aki l’atei w’ɔnɔnyi wa 2016.

“Lakakongɛka wekelo ami wa Bible ndo nsanganya ya lo Mbalasa ka Diolelo lomingu tshɛ l’asolo walomɔlomɔ. Lakoke dia lambɔtshɔkwama ndo laki l’ɔngɛnɔngɛnɔ dia mbeka kɛnɛ ketsha mɛtɛ Bible. L’ɔkɔngɔ w’ɔnɔnyi ɔtɔi la yema, lakakome Ɔmɛnyi wa Jehowa wambobatizama. Etena kɛnɛ kayami l’ɛnɔnyi 79, dimi mbeyaka dia lekɔ lo mboka ka dimɛna. Jehowa ambɔtshɔkɔla lo mbidjami lo nkumbo kande k’ekambi wakayakimɔ le nde.”