“Dzifakazi dza Jehovha dzi di si phari gwadi basi vathu, ganiolu ni simbwana sangu. Litshigu limwedo, Elaine a nga ba a emide vbafuvbi ni gikarinyana a di ninga dzibhiskoitu simbwana sangu. Hwane nya isoso, ni levbini litshigu hi nga ba hi vbindra khu vbafuvbi nya gikarinyana dzimbwa dzangu dzi di gu vbweta gu hongola ga Dzifakazi dzile gasi dzi ya ‘hodza dzibhiskoitu.’

“Hwane nya migima nyo khaguri, dzimbwa dzangu dzi di gu tsakiswa khu dzibhiskoitu, nigu eni nyi di gu tsakiswa khu mabhulo nyo role nyi ga ba nyi manega nawo ni Dzifakazi dzile. Ganiolu, eni kha nya nga ba nyi vbweta gu bhula ngudzu navo. Eni nyi diri ni 70 myaga ni guvbindra nigu kha nya nga ba nyi tiyiseya khesi Dzifakazi dzi nga ba dzi si khodwa. Kha nga olu nyi nga ba nyi khunguvanyegide khu dzitshetshe nya dzingi nyi di hunga gu hevbula Bhibhiliya nyonga.

“Ndrani nya tepo yeyi, nyi wonide Dzifakazi nya dzingi malangani nya gu hambanehambane dhoropani na dzi emide ni sikarinyana. Anidzo dzi di gu phara gwadi vambe nigu idzo dzi di gu hlamula siwudziso sangu khu gu thumisa Bhibhiliya nigu isoso si nyi giride nyi va tumba.

“Litshigu limwedo, Elaine a di nyi wudzisa gu khuye: ‘Ina u ngu khodwa gu khuwe sirengo sinigwa sitago khiyo ga Nungungulu?’ Eni nyi di mu hlamula kheni ‘Ina nyi gu kodwa!’ Elaine a di nyi lereya Isaya 11:6-9. Gukhugeya avbovbo, nyi di gu vbweta gu hevbula nya singi khu Bhibhiliya ganiolu nyi di si vbweti gu dzega mabhuku nya Dzifakazi dza Jehovha.

“Ga matshigu ma nga landreya, nyi manegide ni mabhulo nyo tsakise ni Elaine ni mwama waye Brent. Avo va nyi kutside gu leri Matewu kala Mithumo gasi gu pwisisa gu kheni so thula ginani gu khala Mukristo nya lisine. Khiso kamo nyi giridego. Nya mba hweya nyi di dzumeya gu hevbula Bhibhiliya ni Brent ni Elaine. Isoso si giregide ndrani nya mwaga nya 2016.

“Nyi di gu vireya khu maho nyo fuviye gu manega ni gihevbulo gyangu nya Bhibhiliya semana ni semana ni gu hongola mitshanganoni Salawuni nya Mufumo. Eni nyi tsakide ngudzu khu gu ba nyi hevbude esi Bhibhiliya yi ganeyago. Hwane nya myagana eni nyi di bhabhatiswa kha nga Fakazi ya Jehovha. Olu nyi na ni 79 myaga, nigu nyi ngu bonga ngudzu khu gu ba nyi manide wukhozeyi nya lisine. Jehovha a nyi kategiside khu gu nyi dzumeleya gu gira gipandre nya ndranga yaye.”