«Ja Testigoʼik mi kechan lek smodoʼe soka kristyanoʼiki, cha jachuk soka yal jtsʼiʼiki. Jun kʼakʼu tey ja bʼa yal karrito jun ixuk sbʼiʼil Elaine, skʼapayi ja chabʼ yal jtsʼiʼik (jterriers) jujuntik yal galleta. Tsaʼan ja bʼa jaw, tolabida yajni wa xkiʼaje paxyal ja tiw, wa sjoko sbʼaje bʼa oj kʼotuke ja bʼa ‹chikin kaye ja bʼa yal galletaʼik›».

«Ekʼ ja ixawiki. Ja jtsʼiʼiki jel skʼulane gusto ja yal sgalletaʼe, sok jaxa keʼn, soka tʼusan yamanik wala loʼilaniyon soka Testigoʼik. Pe mini jel xkʼana loʼilanelsoke. Ayxa kiʼoj mas ja 70 jabʼil sok mini xnaʼa sbʼaj lek ja jas wa skʼuʼane ja Testigoʼik. Yuja yawe el jgana ja iglesyaʼik protestante, wa xpensaran masni lek skʼulajel estudiar ja Biblia jach jtuchʼil».

«Ja bʼa tyempo jaw kila mas Testigoʼik soka yal skarritoʼe bʼa tuktukil lugar ja bʼa chonabʼi. Cha jelni lek ja smodoʼe. Tolabida wa xyaweki sjakʼjel soka Biblia ja sjobʼjelik kiʼoji, ja yuj kʼe jipjkʼujol mas bʼa yeʼnle».

«Jun kʼakʼu, ja Elaine sjobʼoki: ‹¿Wan maʼ xa kʼuʼan ke ja chanteʼik jun majtanal bʼa Dyos?›. Kalayabʼ ke ‹janiʼa›. Anto skʼumanki ja Isaías 11:6-9. Man tyempo jaw tukbʼi ja jpensar, ama mini xkala oj kiʼ jun juʼun».

«Yajni ekʼ ja kʼakʼu, ja Elaine sok ja statam Brent, kʼe loʼilanukonsoke tʼusan pe sbʼajni jastik chaʼanyabʼalil. Yalawekabʼ ke la jkʼumuk ja Mateo man Hechos bʼa oj kabʼ stojol jasa ti chʼikan ja snochjel ja Kristo. Sok jachni jkʼulan. Tʼusan tsaʼan, jkʼulan aseptar jun estudio bʼa Biblia soka Brent sok ja Elaine. Ja jaw waj bʼa snalan och bʼa 2016».

«Gustoxta wa xmajlay ja kestudio bʼa Biblia kada semana sok ja reunionik ja bʼa Naʼits bʼa Tsomjelal. Jel gustoʼayon sok jel xkaʼa tsʼakatal yuja bʼobʼ jnebʼ ja jas wa sjeʼa Biblia. Ekʼ tʼusan mas ja jun jabʼil, kiʼaj jaʼ. Ja wego ay kiʼoj 79 jabʼil, sok wa xnaʼa ke teyon ja bʼa lekil bʼej. Ja Jyoba yaʼunej koʼ jlekilal bʼa ajyel bʼa jun pamilya bʼa sutanal ja luʼum bʼa wa xyaʼteltaye ja Jyoba».