Nóksï solu sési kaasïreendi kʼuiripuechani sino ístu juchiiti uíchuechani. Ma xanhari, uarhiiti ma jarhaspti karriturhu enga Elaine arhinhajka ka gaieta íntskuaspti juchiiti uíchu sapirhatichani. Méntkisï engani jimeesïsï páuenga uíchuechani, uékasïreendiksï jima niárani engaksï Jeobaeri testiguecha jarheenga karrituecha jingoni parakaksï intsïnhapiringa gaietechani.

Ióni sáni nitamasptia ka juchiiti uíchuechaksï tsitisïreendi eskaksï gaietechani íntsinhaapiringa ka jíjtuni jima jarhasïreenga parani uandontskuarheni sáni Testiguechani jingoni. Joperuni no káni tsitisïreenga. Jukari 70 jatirispkia ka no sési mítespka ambe engaksï jakajkujka Testiguecha. Ka jimbokani exespka eskaksï máteru relijionicha no jurhimbitku ambe jorhentpisïreenga, eratsespka eska sánderu sési jarhaspka eskani jandiajku jorhenguarhipiringa Biblieri ambe.

Imani tiempu jimbo, sánderuni uápurisï exeasïreengia Testiguechani imeecheri karrituecha jingoni. Imeechajtuksï sési kámpisïreendi. Ka méntkisïjtsïni Biblia jingoni mókuchiantasïreendi kurhamarhikuechani, ísï jimbo sánderuni mintsikaasïreengia.

Ma jurhiatikua, Elaine arhisptirini: ʻ¿Jakajkusïntsï eskaksï animalicha Tata Diosïri intsïmperakua máeska?ʼ. Arhispka eska jo. Ka imarini arhichentaspti Isaías 11:6-9. Ka jima uératini uékaspka jorhenguarhini Biblieri ambe, peruni útasï no ma publikasioni uékasïreenga páni.

Máru jurhiatikuecha tátsekua, ambakiti ambeerichi uandontskuarhespka Elaine ka imeeri uámba Brent jingoni. Pʼímarhisptijtsïni parani arhintani Mateu asta Ukuecha jamberi parakani kurhangupiringa ambe enga arhikuekajka ísï jámani eska Kristu na jámapka. Ka ísï úspka. Ka tátsekua jiókuarhispka eska Brent ka Elaine jorhendapiringajtsïni Biblieri ambe. Inde ambe 2016 teruanisï úkuarhispti.

Kánikua tsitisïreenga Biblieri ambe jorhenguarhini mándani semana ka ístu nirani tánguarhikuecharhu Kʼumanchikua Reinuerirhu. Kánikua sési pʼikuarherasïreenga ka agradesidu jarhani engani jorhenguarhini japka Biblieri ambe. Ka jukari ma uéxurhini tátsekua, itsï atakuarhispka. Iásï 79 jatiriskia ka míteska eskani ambakiti ambe úxaka. Tata Diosï Jeobarini sésikua íntskusti parani familiarhu ma jarhani enga iámu parhakpinirhu jaka ka engaksï imani marhuakujka”.