»Te Testigoetik ma jaʼuknax lek ya skʼoponik te ants winiketik, jaʼnix jich lek ya yilik te tsʼiʼetik kuʼune. Jun buelta jtul ants te Elaine sbiil te ay ta carrito-ae, la yakʼbey galleta te chaʼkojt jtsʼiʼe. Ta patil, spisil-ora te kʼalal ya kikʼ lokʼel ta beele, ya snitonik bael ta ora yuʼun ya xkʼotik tey ta ‹esquina te banti ya x-akʼbotik te galletae›.

»Te kʼalal kʼax bael te tiempoe. Maba ya xjalajon ta kʼop sok te Testigoetike, pero te tsʼiʼetik kuʼune bayal ya smulanik sweʼel te galletaetik. Kʼaxemix ta 70 kaʼbilal-a sok ma jnaʼ ta lek te bin ya schʼuunik te Testigoetik. Te bitʼil la schebajtesbon koʼtan te iglesiaetik protestante, la jta ta nopel te jaʼ lek te jtukel ya jnop te Bibliae.

»Ta patil la kil yantik Testigoetik te ayik ta carritoetik ta yanyantik lugar. Jaʼnix jich leknax yoʼtanik. Spisil-ora ya yakʼbeyik sujtib ta Biblia te jojkʼoyeletik kuʼune, jich jajch kakʼxan smukʼul koʼtan ta stojolik.

»Jun buelta, te Elaine jich la sjojkʼoybon: ‹¿Jaʼbal jun majtanil yuʼun Dios ya akuy te chambalametike?›. La kalbey te jaʼe. Ta patil la skʼoponbon Isaías 11:6-9. Jaʼto tal-abi jelon te bin jnopoj ta stojolik, manchukme ta yorail-abi mato jkʼan ya kichʼ bael junuk publicación.

»Ta yantik kʼajkʼal ay bintik mukʼ skʼoplal la yakʼbon jnop te Elaine sok te Brent. La yalbonik te yakuk jkʼopon te Mateo kʼalal ta Hechos yuʼun ya xkʼot ta koʼtan te bin ya skʼan ya yal te ya jtʼuntik te Cristo. Jich la jpas. Jaʼ yuʼun ta olil bael yuʼun te jaʼbil 2016 la jkʼan te yakuk snojptesonik ta Biblia te Brent sok te yinam Elaine.

»Koʼtanukix ya jnop te Biblia ta jujun semana sok te ya xboon ta tsoblejetike. Tseʼelnax koʼtan sok ya kal wokol ta swenta te bin yakon ta snopel ta Biblia. Jaʼ yuʼun ta patil, la kichʼ jaʼ. Ta ora ini ayix 79 kaʼbilal sok ya jnaʼ te jaʼ smelelil te banti ayone. Te Jehová yakʼojbon bendición te bitʼil ayon ta s-organización te jun-nax ya yichʼik ta mukʼe».