“Olombangi viaco Via Yehova, ka via endaile oku tata lika ciwa omanu, pole, va endavo oku tata ciwa olombua viange. Eteke limue, manji Elaine okuti wa talamele ocipepi lokakãlu, wa eca okulia kolombua viange vivali. Olonjanja viosi tua enda oku amẽla ocipepi lotuakãlu, olombua via yonguile okuti, Olombangi Via Yehova vi va ĩha vali ‘okulia.’

“Pa pita olosãi vimue. Olombua via enda oku sola okulia ovo va enda oku eca kokuavio kuenda ame nda solaile olombangulo nda enda oku kuata Lolombangi viaco Via Yehova. Pole, ame sia yonguile oku sapela lavo calua. Ame nda kuatele 70 kanyamo kuenda sia kũlĩhĩle kueci Olombangi Via Yehova vi tava. Omo okuti nda sumuile omo liovina vakuetavo Lioprotestande va enda oku linga, nda sima ndoco, hĩse ndi lilongise Embimbiliya lika liange.

“Vokuenda kuotembo yaco, nda enda oku mola Olombangi vikuavo Via Yehova kolonepa via litepa violupale okuti, via talama ocipepi lotuakãlu tuavo tualivulu. Va kalavo omanu vawa. Ovo va enda oku tambulula apulilo ange lekuatiso Liembimbiliya, kuenje ovina viaco via ndi vetiya oku kolela kokuavo.

“Eteke limue manji Elaine wa ndi pula hati: ‘Wa kũlĩha okuti Suku wa kapako ovinyama?’ Ndo tambulula okuti, ‘Oco, nda ci kũlĩha!’ Manji Elaine wa ndi tangela Isaya 11:6-9. Oku upisa opo, nda yonguile oku kũlĩha ovina vikuavo viatiamẽla Kembimbiliya pole, sia yonguile oku tambula alivulu.

“Vokuenda kuoloneke, nda fetika oku kuata onjongole kombangulo nda enda oku kuata la manji Elaine kumue lulume waye Brent. Ovo va ndi vetiya oku tanga elivulu lia Mateo kuenda Liovilinga, oco ndi kuate elomboloko lieci ci lomboloka oku kala Ukristão wocili. Kuenje, nda ci linga. Ka pa pitile otembo yalua, nda tava oku lilongisa Embimbiliya la manji Brent kuenda Elaine. Eci ca kala vokuenda kunyamo 2016.

“Nda enda oku talamẽla lesanju elilongiso liange Liembimbiliya vokuenda kuosemana kuenda olohongele Vonjango Yusoma. Nda yeva esanju lialua omo lioku lilongisa eci Embimbiliya li popia. Noke liunyamo umosi, nda papatisiwa Ndombangi ya Yehova. Cilo, ndi kuete 79 kanyamo kuenda ndi pandula calua omo lioku sanga etavo liocili. Yehova wa ndi sumũlũisa poku ecelela okuti, ndi panga onepa kepata liafendeli vaye voluali luosi.”